Shymkentte esirtki satýmen aınalysqan qylmystyq top quryqtaldy
ASTANA. QazAqparat - OQO ІІD Esirtki bıznesine qarsy kúres basqarmasynyń qyzmetkerleri jedel-izdestirý is-sharalarynyń barysynda esirtki saqtaý jáne satýmen aınalysqan 4 adamnan quralǵan qylmystyq topty quryqtady. Olar Shymkent qalasynyń 1964, 1966, 1977 jáne 1984 jyly týǵan turǵyndary jáne kúdiktilerdiń eshbiri esh jerde jumys istemegen. Bul týraly atalǵan vedomstvonyń baspasóz qyzmeti habarlaıdy.
Polıtseıler kúdikti azamattardyń úıin tintý barysynda birneshe orama marıhýana men kóknár sabynyn tárkiledi. Sot-krımınalıstıkalyq saraptamaǵa sáıkes, tárkilengen esirtki zattarynyń jalpy salmaǵy 300 gr. shamasynda bolyp otyr. Tergeý barysynda anyqtalǵandaı, topty 51 jastaǵy er azamat basqaryp otyrǵan, ol telefon arqyly esirtki zattaryn ótkizý týraly buıryqtar berip, satýdyń jańa arnalaryn izdep otyrǵan.
Atalǵan jaıt boıynsha QR QK-niń 262 «Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý», 297 «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» baptary boıynsha qylmystyq is qozǵaldy. Kúdiktiler qamaýda. Sotqa deıingi tergeý amaldary júrgizilýde.
Qazirgi tańda polıtseıler qylmystyq isti sotqa joldaý úshin barlyq jedel-izdestirý is-sharalaryn qarastyrýda.
