Shymkentte «Erkindigim-Eldigim» respýblıkalyq ən baıqaýy ótýde
ShYMKENT. QazAqparat - Shymkentte belgili sazger Israıl Saparbaı ánderinen "Erkindigim-Eldigim" respýblıkalyq ən baıqaýy ótýde. Oǵan elimizdiń Almaty, Qyzylorda, Atyraý, Shyǵys Qazaqstan oblystarynan jáne Ońtústik Qazaqstan oblysynyń aýdan, qalalarynan 45 úmitker qatysyp otyr, dep habarlaıdy QazAqparat tilshisi.
Memleket basshysy N.Nazarbaevtyń «Bolashaqqa baǵdar: rýhanı jańǵyrý» maqalasyndaǵy «Týǵan jer» baǵdarlamasyn júzege asyrý maqsatynda aqyn-sazger, dramatýrg Israıl Saparbaıdyń 75 jasqa tolý mereıtoıyna arnalǵan «Erkindigim - eldigim» respýblıkalyq án baıqaýy ótýde. Aıtýly sharany ótkizýge Mádenıet jáne sport mınıstrligi men oblys ákimdigi jáne oblystyq mádenıet basqarmasy muryndyq boldy. Sazgerdiń shyǵarmashylyǵyn keńinen nasıhattaý men dáripteý, sondaı-aq onyń ánderi arqyly eldiń rýhyn bıiktetý maqsatynda uıymdastyrylǵan baıqaýǵa qatysýǵa respýblıkanyń birneshe oblystarynan jas ánshiler keldi. Qazaq estradasynyń daryn ıelerin anyqtaý jáne olardyń oryndaý sheberlikterin arttyra otyryp, jeke shyǵarmashyl tulǵalardyń qalyptasýyna yqpal etý baǵytynda ótip jatǵan óner saıysynda 45 úmitker ótinish bildirip, 18 úmitker ekinshi kezeńge joldama aldy. Úsh kezeńnen turatyn baıqaýdyń sharttary men talaptaryna sáıkes, 18-35 jas aralyǵyndaǵy jeke ánshiler nemese toptyq qatysýshylar óz tańdaýy boıynsha azamattyq-patrıottyq, balalar ánderi, mahabbat lırıkasy, romans syndy túrli janrdaǵy tek avtordyń óz ánderin folklorlyq nemese estradalyq baǵytta tabıǵı daýysta oryndaýy tıis. Olardyń óneri men oryndaýshylyq qabiletin kompozıtor, QR eńbek sińirgen qaıratkeri, «Qurmet» jáne «Parasat» ordenderiniń ıegeri Keńes Dúısekeev jáne ánshi, QR eńbek sińirgen artısi Sembek Jumaǵalıev syndy óner maıtalmandary qazylyq etýde. Jeńimpazdar 6 qazan kúni Shymkent qalasyndaǵy «Túrkistan» saraıynda ótetin gala-kontsertte marapattalady dep josparlanyp otyr. 
Gala-kontsertte sonymen qatar Sembek Jumaǵalıev, Ábıirbek Tinalıev jáne Shahızada syndy qazaq estradasynyń ánshileri óner kórsetedi dep kútilýde.
Aıta keteıik, Israıl Saparbaı 160-tan asa ánder men 150-ge tarta án mátinderiniń avtory. Táýelsiz «Platınaly Tarlan» syılyǵynyń jáne memlekettik «Parasat» ordeniniń ıegeri, Ońtústik Qazaqstan oblysynyń, Shymkent qalasynyń Qurmetti azamaty.
