Shymkentte er adam tutqyndardy kepilge alǵany týraly habarlap, ushaq pen aqsha talap etti
ShYMKENT. QazAqparat - Shymkentte «telefon lańkesi» ustaldy. 1963 jylǵy er adamǵa qatysty QR QK-niń 273 baby («Lańkestik aktisi týraly kórineý jalǵan habarlama berý») boıynsha qylmystyq is qozǵaldy, dep habarlady OQO ІІD-niń baspasóz qyzmetinen.
Oqıǵa 29 maýsym kúni saǵat 23:30-da oryn alǵan. UQKD-niń kezekshilik bólimine telefon soqqan belgisiz er adam birneshe adamdy tutqynǵa alǵanyn, bes qabatty úıge mına qoıǵanyn aıtyp, QR UQKD-niń joǵary ókiletti ofıtserimen kezdesýin talap etti. Budan basqa, er adam oǵan aqsha, ushaq qajet ekenin aıtyp, onyń oıynsha, jazasyn zańsyz ótep júrgen birneshe sottalǵan azamatty bosatýyn talap etken.
Shymkent ІІB-nyń bastyǵy Danııar Meıirhannyń aıtýynsha, OQO ІІD generaly Asqar Ospanov jáne basqa joǵary ókiletti ofıtserlerdiń basshylyǵymen bir jarym saǵat júrgizilgen is-qımyldar kezinde er adam syrtqa shyǵarylyp, sol jerde ustaldy. Qoıylǵan bomba týraly habarlanǵan telefon qońyraýynan keıin 300-den astam adam qaýipsiz jerge kóshirilgen. Olardyń arasynda bes qabatty úıdiń turǵyndary, sondaı-aq eki dámhana men shaǵyn marketterdiń kelýshileri men qyzmetkerleri bolǵan. Budan basqa, qorshalǵan orynda arnaıy operatsııa aıaqtalǵansha kólik qozǵalysy toqtatylyp, kommýnıkatsııalar ajyratylǵan.
