Shymkentte enesinen kek almaq bolǵan kelin úıdi tonap ketti dep aldaǵan
ShYMKENT. QazAqparat - Shymkentte enesinen kek almaq bolǵan kelin úıdi tonap ketti dep aldaǵan. Sóıtip altyn buıymdary men aqshalaryn jasyryp qoıǵany anyqtaldy, dep habarlaıdy QazAqparat HAA tilshisi.
Oqıǵa ornyna kelgen tártip saqshylary úıdiń astań-kesteńi shyǵyp jatqanyn kóredi. Sol úıdiń kelini bolsa belgisiz úsheý betperde kıip, úıdi tonap ketkenin aıtqan. Onyń sózinshe kúdiktiler kúsh kórsetý arqyly aqshalar men altyn buıymdardy qoldy etipti. Jedel izdestirý sharalaryn júrgizgen Abaı aýdandyq polıtsııa bóliminiń qyzmetkerleri artynsha jábirlenýshiniń aıtqandary jalǵan ekenin anyqtady. Belgili bolǵandaı 26 jastaǵy kelinshek úıdegi zattardy ózi urlap, jertólege jasyryp qoıǵan. Sońynan polıtsııa qyzmetkerlerin shaqyrtqan. Osylaısha ol jýyrdaǵa ǵana urysyp qalǵan enesinen kek almaq bolǵanyn aıtypty. Qazirgi tańda jalǵan habarlama bergen áıeldiń ústinen Qylmystyq kodekstiń 419-baby «Kórineý jalǵan sóz jetkizý» boıynsha is qozǵalyp, tergeý amaldary júrgizilýde.
Óńirdiń tártip saqshylary bolsa sońǵy kezde osy syndy jalǵan habarlama berip, qylmys jasaıtyndar kóbeıip bara jatqanyn aıtady. Máselen, jyl basynan beri Qylmystyq kodekstiń 419-babymen 16 is qozǵalyp, sotqa joldanǵan. 
