Shymkentte energetıkalyq sýsyn shyǵaratyn jasyryn tsehtyń qyzmeti toqtatyldy

ASTANA. QazAqparat - Bıznes quqyqtaryn qorǵaý jáne kóleńkeli ekonomıkamen kúres boıynsha júrgizilip jatqan jumys aıasynda tanymal energetıkalyq sýsyn shyǵaratyn jasyryn tsehtyń qyzmetin QMA Shymkent qalasy boıynsha departamenti toqtatty.

Bul týraly QazAqparat QR Qarjylyq monıtorıng agenttiginiń baspasóz yqzmetine silteme jasap habarlaıdy.

Qalalyq sanıtarlyq-epıdemıologııalyq baqylaý departamentiniń mamandary jáne saýda markasynyń quqyq ıelenýshiniń ókilderimen júrgizilgen jedel-izdestirý is-sharalary barysynda: 21 myńnan astam quty kontrafaktilik sýsynnyń daıyn ónimderi, taýar belgisi bar 54 myń danadan astam bos bankalar energetıkalyq sýsyndy quıýǵa arnalǵan jabdyq, sııa búrikkish japsyrma, oraý qurylǵylary, qaqpaqtar, qurǵaq qospalar (lımon qyshqyly, kofeın, soda, boıaǵyshtar, qant, qyshqyldyqty rettegishter) tárkilendi.

Keltirilgen shyǵyn kólemi 37 mln teńgeden asady.

Ulttyq saraptama ortalyǵynyń mıkrobıologııalyq zertteý hattamasyna sáıkes, tárkilengen sýsynnyń quramynda ruqsat etilgen mólsherden eki ese joǵary zeń men ashytqy bar.

Bul ónim tutynýǵa jaramsyz, óıtkeni ol adam densaýlyǵyna, ásirese jas aǵzaǵa zııan keltiredi.

Atalǵan fakti boıynsha sotqa deıingi tergeý bastaldy. Tergeý múddesindegi basqa aqparat jarııa etilmeıdi.

«QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi»,-delingen habarlamada.