Shymkentte elimizdegi eń úlken sý qalashyǵy ashyldy
ShYMKENT. QazAqparat - Jeksenbi kúni Shymkent qalasynda «Fontan» akvaparki ashyldy. Zamanaýı úlgide salynǵan demalys ornynyń ashylý saltanatyna oblys ákimi Janseıit Túımebaev qatysyp, qala qonaqtary men turǵyndaryn quttyqtady, dep habarlaıdy QazAqparat tilshisi.
Akvapark 2 gektar aýmaqty alyp jatyr. Onda bıikten syrǵanaıtyn 8 tóbeshik ornalasqan. Onyń 2-eýi bıiktigi 22 metrdi quraıtyn elimizdegi eń bıik tóbeshik bolsa, TMD elderi arasynda eń uzyn syrǵanaıtyn oryn sanalady. Munda jasandy tolqyn jáne basseıin sýyn jylytýǵa arnalǵan qurylǵylar ornatylǵan. Akvaparkti kórip shyqqan aımaq basshysy bul Ortalyq Azııadaǵy eresekter men balalarǵa arnalǵan eń úlken sý qalashyǵy ekenin atap ótti.
«Mine, barshamyz qýanyshty oqıǵanyń kýási bolyp otyrmyz. Jańadan ashylyp otyrǵan zamanaýı akvapark barlyq talapqa saı etip jasalǵan. Búginde qalamyzda halyqtyń tynyǵyp, demalýyna arnalǵan oryndar kóbeıip keledi. Máselen, jýyrda ǵana qalany qaq jaryp aǵatyn Qoshqar ata ózeniniń boıy abattandyrylyp, sýǵa shomylýǵa arnalǵan oryndar paıda boldy. Mundaı jumystar áli de jalǵasyn tabatyn bolady», - dedi Janseıit Túımebaev.
Al akvaparkti salǵan kásipkerdiń aıtýynsha, demalys aımaǵynda 200-ge jýyq adam jumyspen qamtylǵan. Táýligine 2 myńnan astam kelýshige qyzmet kórsetýge qaýqarly.
Shara barysynda balalarǵa arnalǵan oıyn-saýyq baǵdarlamasy men utys oıyndary uıymdastyryldy. Kesh sońy Qazaqstannyń estrada juldyzdarynyń qatysýymen kontserttik baǵdarlamaǵa ulasty.
