Shymkentte elimizde balamasy joq boks ortalyǵy salynyp jatyr
ShYMKENT. QazAqparat - Shymkentte biregeı sport kesheni - Boks ortalyǵy ashylady. N5 boks sport mektebiniń janynan salynyp jatqan nysandy shahar basshysy Ǵabıdolla Ábdirahymov aralap kórdi, dep habarlaıdy QazAqparat HAA tilshisi.
Búgingi tańda jańa ǵımarattyń qurylys-montaj jumystary aıaqtaldy. Sport mektebiniń 2 qabatty ákimshilik ǵımaraty men 210 oryndy jańa sport zaly paıda boldy.
«Bul - biregeı joba. Mundaı ortalyq Qazaqstannyń basqa esh jerinde joq. Iá, zaldar bar, jarysqa arnalǵan oryndar bar, degenmen, alǵash bolyp bizdiń qalamyzda tutas keshen soǵylyp otyr. Endi bizdiń mektebimizde halyqaralyq oqý jıyndaryn da ótkizýge bolady. Barlyq jaǵdaı jasalǵan», - dedi qalalyq N5 boks sporty mektebiniń dırektory Zańǵar Qasqaev.
Endi qurylysshylar ózge aımaqtardan keletin sportshylar úshin jataqhana salý ústinde. Sondaı-aq boks mektebiniń eski ǵımaraty da jóndelýde, mekteptiń jaryqtandyrylýy da óz dárejesinde bolmaq.
Aıta keteıik, Qazaqstan boks federatsııasynyń atqarý bıýrosy 2017 jyly týǵan erler arasyndaǵy el chempıonatyn ótkizýge ótinishterdi qaraı kele, bul quqyqty biraýyzdan Shymkentke berip otyr. Chempıonat 6-12 qarasha aralyǵynda Shymkent qalasynda ótedi dep habarlaıdy QBF saıty. Buǵan deıin bul jarysty dástúrli túrde jeńil atletıka manejinde ótkizý josparlanǵan edi. Degenmen, boks ortalyǵy qonaqtardy kásibı deńgeıde qabyldaýǵa daıyn bolǵandyqtan, el chempıonaty boks mektebiniń jańa ǵımaratynda ótýi múmkin. OQO boks federatsııasynyń ókilderi ortalyqtyń múmkindikterin baǵalap úlgerdi.
