Shymkentte Elbasy týraly qos kitaptyń tusaýy kesildi

ASTANA. QazAqparat - Búgin Shymkenttegi oblystyq orys drama teatrynda «Asqaqtaı ber, Astana!» atty saltanatty is-shara ótti. Shara aıasynda elimizdiń táýelsizdigi men tarıhyn, jetistikterin nasıhattaıtyn «Jahan tanyǵan jeti tulǵa», «Tulǵa. Táýelsizdik. Tarıh» atty qos kitaptyń tusaýy kesildi, dep habarlady QazAqparatqa OQO ákimdiginiń baspasóz qyzmetinen.

Jıyn barysynda oblys ákimi Janseıit Túımebaev eki kitaptyń mazmuny men mánine erekshe toqtalyp, jınalǵandardy Astana kúnimen quttyqtady.

«Búgin tusaýy kesilgen «Jahan tanyǵan jeti tulǵa» - aty aıtyp turǵandaı, álemge áıgili bolǵan reformatorlar týraly keńinen tolǵanyp jazylǵan dúnıe. Árıne olardyń ortasynan oıyp turyp oryn alǵan Uly dala perzenti, Ult kóshbasshysy Nursultan Ábishuly Nazarbaevtyń Táýelsiz Qazaq elin qalyptastyrýdaǵy qıyn da, kúrdeli kezeńderden jol taýyp shyqqandyǵy baıandalady. «Tulǵa.Táýelsizdik.Tarıh» atty kitaptyń da ózindik ereksheligi bar. «Ordabasyǵa oralý» degen alǵashqy bólimde Elbasynyń qasıetti mekenge taban tiregeni týrasynda tolǵanatyn tustar kóp»,-dedi Janseıit Qanseıituly.

«Tulǵa.Táýelsizdik.Tarıh» atty kitap úsh bólimnen turady. Atalǵan týyndyda «Ordabasyǵa oralý» degen alǵashqy bólimde Elbasynyń qasıetti mekenge taban tiregeni týrasynda tolǵanatyn tustar jan-jaqty qamtylǵan.   Kitaptyń ekinshi bóliminde Elbasymyzdyń shetel basshylarymen ońtústikte kezdesýleri sátti sýretterimen  áńgimege arqaý bolǵan. Al úshinshi bólimde memleket basshysynyń oblysymyzǵa 1991 jyldan bastalǵan saparlary jan-jaqty baıandalady. Basylymǵa taıaýdaǵy ońtústik óńirine jasaǵan sáýirdegi sapary da engizilip otyr.

"Jahan tanyǵan jeti tulǵa" kitabynyń avtory Abaı Eskendirov atalǵan týyndyny 4 jylda jazyp shyqqanyn aıtady.  656 betten turatyn týyndyda tarıhı tulǵalardyń el basqarý úrdisindegi ǵıbratty ǵumyrlary áńgimege arqaý bolǵan. Jer jahanǵa aty málim jeti tulǵanyń óz otandastarynyń da, jatjerlikterdiń de sanasynda serpilis týdyrǵan taǵdyrlary eshkimdi beıjaı qaldyrmaıdy.

"Kitaptyń jalpy mazmuny - jahan tanyǵan jeti tulǵa haqynda. Djordj Vashıngton, Mahatma Gandı, Ýnıston Cherchıll, Mustafa Kemal, Sharl de Goll, Lı Kýan ıÝ, Nursultan Nazarbaev syndy uly jeti tulǵanyń eren eńbekteri jan-jaqty qamtylǵan"-, deıdi kitap avtory Abaı Eskermesuly.

Shara barysynda oblys əkim qos kitaptyń jaryqqa shyǵýyna atsalysqan "Qazyǵurt" baspasynyń dırektory, aqyn Temirǵalı Kópbaevty, "Təýelsizdik, Tulǵa, Tarıh" qurastyrýshysy Asylbek Dosalyny, «Jahan tanyǵan jeti tulǵa» kitabynyń avtory Abaı Eskendirovke alǵys hatpen marapattady.

Foto: Samat Myrzalıev