Shymkentte ekskavator júrgizýshisiniń kesirinen 2,5 myń úı gazsyz qaldy
ShYMKENT. QazAqparat - Shymkentte ekskavator júrgizýshisiniń kesirinen 2500 úı men birqatar kommýnaldyq jáne óndiristik mekemeler kógildir otynsyz qaldy, dep habarlaıdy QazAqparat tilshisi.
Gaz taratýshy mekemeniń málimetinshe, qalada qurylys jumystaryn júrgizý kezinde ekskavator júrgizýshisi joǵary qysymdy gaz qubyryn buzyp ketken.
«20 mamyr kúni saǵat 15.00 shamasynda qala turǵyndarynyń birinen Tassaı eldi mekenindegi Jibek joly men Babashuly kósheleriniń qıylysynda gaz qubyry buzylǵany týraly habarlama túsken. Shaqyrylǵan orynǵa jetken avarııalyq brıgada mamandary qaladaǵy tanymal qurylys kompanııalarynyń birine tıesili «XCMG» markaly traktor-ekskavator júrgizýshisi jer qazý jumystaryn júrgizý kezinde joǵary qysymdy gaz qubyryn buzyp ketkenin anyqtady. Gazdyń aýaǵa taralýy toqtatyldy», delingen habarlamada.
Saldarynan Tassaı (ishinara), Tasken, Dostyq, Mártóbe, Qyzylsaı eldi mekenderi ýaqytsha kógildir otynnan ajyratyldy. Sondaı-aq 2-shi aýdandyq, №11,19, 10 ujymdyq , 32 jeke ujymdyq gazdy retteýshi beket, 30 kommýnaldyq-turmystyq kásiporyn, 6 óndiristik mekeme, 2500 jeke sektor tutynýshylaryna ýaqytsha gaz berý toqtatyldy.
Aıta keteıik, atalǵan gaz qubyry «QazTransGaz Aımaq» kompanııasynyń menshiginde.
