Shymkentte eki kólik soqtyǵysyp, 9 adam zardap shekti
ShYMKENT. QazAqparat - Shymkentte eki kólik soqtyǵysyp, 9 adam zardap shekti. Jaraqat alǵan 4 bala men 5 eresek jolaýshy aýrýhanaǵa jetkizildi, dep habarlaıdy QazAqparat HAA tilshisi.
Qaıǵyly oqıǵa túngi 1:30-dar shamasynda oryn alǵan. Arǵynbekov pen Báıterek kósheleriniń qıylysynda «Mq350» men «Deý Neksııa» markaly kólikteri betpe-bet soqtyǵysyp qalady. Saldarynan eki kóliktegi jolaýshylardyń barlyǵy túrli dene jaraqatyn alǵan. Olardyń qatarynda bolǵan 4 bala qazir oblystyq aýrýhanada jatyr. Dárigerlerdiń sózinshe, tórteýiniń de jaǵdaıy bastapqyda aýyr bolǵan soń, jansaqtaý bólimine jatqyzylǵan. Búgin bireýiniń beti beri qaraǵan soń palataǵa aýystyryldy.
«Bizge túsken naýqas balalardyń barlyǵy aǵaıyndy azamattardyń balalary. Ekeýi 13 , biri 9, tórtinshisi 3 jasta. Tórteýi de bas mı jaraqatyn alǵan, betterine zaqym kelgen. Ásirese, 13 jastaǵy qyzdyń jaǵdaıy aýyr bolyp tur. Biraq aman qalady degen senimdemiz. Taǵy ekeýi jansaqtaý bóliminde. Jan-jaqtan dárigerler kelip, emdik sharalaryn júrgizýde. Al, úsh jastaǵy balanyń jaǵdaıy qalypqa túsken soń palataǵa aýystyrdyq»,-deıdi oblystyq balalar aýrýhanasy bas dárigeriniń orynbasary Bolat Nusqabaev.
Qos kólikte bolǵan bes jolaýshy Shymkent qalalyq jedel járdem aýrýhanasyna jatqyzyldy.
«Bizge túsken naýqastardyń ishinde 17 jastaǵy qyz, 33 jáne 40 jastaǵy áıelder men 24 jáne 19 jastaǵy er azamattar bar. Olardyń barlyǵy jedel neırohırýrgııa bólimshesine jatqyzylǵan bolatyn. Sebebi, barlyǵy da túrli dene jaraqatyn alǵan. 24 jastaǵy jigit aýrýhanada em qabyldaýdan bas tartyp, ketip qaldy. Ózgelerine alǵan jaraqattaryna baılanysty emdik sharalary kórsetilýde»,-deıdi qabyldaý bóliminiń meńgerýshisi Sábıt Baıbosynov.
Jol-kólik oqıǵasyna oraı málimet bergen Oblystyq ІІD baspasóz qyzmeti «Deý Neksııa» avtokóliginde 7 jolaýshy bolǵanyn habarlady. Atalǵan jaıt boıynsha Qylmystyq kodekstiń 345-baby «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýymen» is qozǵalyp, tergeý amaldary júrgizilýde. Sondaı-aq sot-medıtsınalyq birneshe saraptamalar taǵaıyndalǵan. Jaramsyz kúıge túsken qos avtokólik aıypturaqqa jetkizilip, jol apatynyń kimniń kinásinen bolǵany anyqtalýda.
