Shymkentte eki qaıyrymdy azamat Prezıdent marapatyna ıe boldy

ShYMKENT. QazAqparat – Shymkentte 11 jasar balanyń ómirin saqtap qalǵan zeınetker men múgedek jandarǵa qol ushyn sozyp júrgen azamat erekshe qurmetke bólendi. Qala ákimi Erlan Aıtahanov «El baqytyn terbetken - Táýelsizdik!» atty saltanatty jıynda eki turǵynǵa Prezıdent marapatyn tapsyrdy, dep habarlaıdy QazAqparat tilshisi.

Táýelsizdik kúnine 11 jasar balanyń ómirine tóngen qaýipten aman alyp qalǵan zeınetker Orazkúl Aıtjanova QR Prezıdentiniń Qurmet Gramotasymen marapattaldy. Al, múgedekterdiń múddesi men qoǵamdyq qyzmette sińirgen eńbegi úshin «Synaq» múgedekter qoǵamdyq birlestikter qorynyń tóraǵasy Murat Jetpisbaev «Eren eńbegi úshin» medalimen marapattaldy. Ózi birinshi toptaǵy múgedek bolǵanyna qaramastan ol qoǵamdyq jumystarǵa belsene aralasyp, áleýmettik qamqorlyqqa zárý azamattarǵa jyldar boıy kómek qolyn sozyp keledi.

Atalǵan marapatty qala ákimi Erlan Aıtahanov tapsyryp, janashyr azamattarǵa zor alǵysyn bildirdi. Sonymen qatar, qaıyrymdy qalanyń ár azamaty osyndaı qaısarlyq tanytyp, ózgege meıirimdilik kórsetetinine senimdi ekenin jetkizdi.

Aıta keteıik, qoǵamdyq qyzmette belsendilik tanytatyn Orazkúl Aıtjanova - tórt balanyń anasy, 15 nemereniń ájesi. Al, qaısar minezdi Murat Ábdikárimuly bes balanyń ákesi. Ol tóraǵalyq etetin qoǵamdyq uıym búginde az qamtylǵan, múgedek azamattardyń kóptegen máseleleriniń sheshimin tabýyna óz septigin tıgizip keledi.

Budan bólek merekelik jıynda QR Prezıdentiniń Jarlyǵyna sáıkes, memlekettik jáne qoǵamdyq qyzmette sińirgen eńbegi, eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin Shymkent qalasynyń 39 azamaty QR Memlekettik nagradalarymen marapattaldy.