Shymkentte eki balanyń anasyn ólimshi etip uryp, zorlap ketken kúdiktilerdiń biri ustaldy
Qalalyq PD baspasóz qyzmetiniń málimetinshe, Abaı aýdandyq polıtsııa basqarmasynyń qyzmetkerleri jedel-izdestirý sharalary barysynda 48 jastaǵy kúdiktini qolǵa túsirgen. Onyń jergilikti turǵyn ekeni anyqtalyp, ýaqytsha ustaý ızolıatoryna qamaldy.
«26 mamyr kúni 39 jastaǵy jergilikti turǵynnyń dene jaraqatyn alý faktisi boıynsha QR QK 107-babynyń 1-bóligimen sotqa deıingi tergeý júrip jatyr. Oqıǵa ornynda jedel tergeý toby barlyq qajetti is-sharalardy ótkizip, qylmys jasaýǵa qatysy bar adamdy anyqtady. Birqatar tıisti saraptamalar taǵaıyndaldy. Taǵaıyndalǵan saraptamalardyń qorytyndysy boıynsha protsessýaldyq sheshim qabyldanady. Tergeý barysy prokýratýra men polıtsııa departamenti basshysynyń baqylaýynda» delingen habarlamada.
Sondaı-aq, polıtsııa departamenti basshylyǵynyń bastamasymen jábirlenýshige psıhologııalyq kómek kórsetý maqsatynda maman Aıgúl Rahmetova men QR Prezıdentiniń janyndaǵy ulttyq qoǵamdyq senim keńesiniń múshesi Aıgúl Orynbekpen kezdesý uıymdastyrylǵan.
Aıta keteıik, buǵan deıin 39 jastaǵy áıeldi belgisiz bireýler kóshede ketip bara jatqan jerinen ólimshi etip sabap, zorlap ketkenin habarlaǵan bolatynbyz. Áıeldi jábirlegender tipti onyń basynan tselofan paket kıgizip, tunshyqtyryp óltirmek bolǵan.
Tisterin túk qaldyrmaı syndyryp, jaǵyn úsh jerden syndyrǵan edi. Mıy qatty shaıqalyp, esinen tanyp qalǵan áıeldi qylmyskerler óldi dep sanap, denesin butaqpen jaýyp ketken bolatyn.
Alaıda saý tamtyǵy qalmaǵan áıel esin jınap, áreń degende úıine jetken. Keıinnen bul isti qalalyq polıtsııa departamentiniń bastyǵy óz baqylaýyna alǵany belgili.