Shymkentte eki áıeldi atyp ketkenderge izdeý jarııalandy
ShYMKENT. QazAqparat - Shymkentte osydan úsh aı buryn qaıtys bolǵan kásipkerdiń enesi men áıelin óltirip ketti. Qandy oqıǵa qala irgesindegi Tassaı eldi mekeninde oryn alǵan. Jergilikti polıtsııa kúdiktilerge izdeý jarııalady, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, kúdiktiler úıge basa-kóktep kirip, marqumnyń enesi men áıelin atyp ketken. Aýyr dene jaraqatyn alǵan qos jábirlenýshi oqıǵa ornynda qaza tapqan.
«16 naýryz kúni Shymkent QІІB Qarataý polıtsııa beketine telefon arqyly 1984 jyly týylǵan jergilikti jerdiń turǵyny aryzdanǵan. Ol belgisiz tulǵalar kórshi úıge basa-kóktep kireıin dep jatyr dep habarlaǵan. Oqıǵa ornyna kelip jetken polıtsııa qyzmetkerleri óz úıinde zorlyq-zombylyq belgilerimen óltirilgen eki áıeldiń máıitin tapty. Tártip saqshylary olardyń úı ıesiniń 1931 jylǵy enesi men 1950 jylǵy áıeli ekenin anyqtady. Atalǵan jaıt Qarataý polıtsııa beketiniń sotqa deıingi tergep-tekserý tizilimine tirkeldi. QR QK-niń adam óltirý boıynsha sotqa deıingi tergeý jumystary júrgizilýde», delingen baspasóz habarlamasynda.
Qazirgi tańda polıtsııa qyzmetkerleri marqumdardy qandaı maqsatpen óltirgenin anyqtaýda. Sondaı-aq kúdiktilerdiń tulǵasyn anyqtaý, ustaý sharalary júrgizilip jatyr.
