Shymkentte eki adam gazdan ýlanyp kóz jumdy
ASTANA. QazAqparat - Elimizde 3-4 jeltoqsan kúnderi 6 ýly jáne tabıǵı gazben ýlaný oqıǵasy tirkeldi. Al gaz jabdyǵynyń aqaýynan Shymkenttiń eki turǵyny ýlanyp kóz jumdy, dep habarlaıdy QazAqparat tilshisi.
QR ІІM Tótenshe jaǵdaılar komıtetiniń málimetinshe, qaıǵyly jaǵdaı Shymkent qalasynyń Eńbekshi aýdanynda tirkelgen. Sonymen qatar Pavlodar, Jambyl, Almaty oblystarynda qatty otynmen jáne tabıǵı gazben peshtiń aqaýynan 11 adam (onyń ishinde 5 bala) aýrýhanaǵa jatqyzylǵan.
«Jylytý maýsymy bastalǵaly beri respýblıkanyń turǵyn sektorynda ýly gazben ýlanýdyń saldarynan 17 adam qaza bolyp, 28 adam túrli jaraqat alǵan. Tabıǵı gazben ýlanýdan 15 adam qaza taýyp, 13 adam jaraqat alǵan» delingen habarlamada.
