Shymkentte egde jastaǵy kásipker áıeldi óltirgen kúdikti ustaldy
ShYMKENT. 5 shilde. QazAqparat - Ońtústik Qazaqstan oblysynyń polıtseıleri adam óltirý qylmysyna qatysy bar kúdiktini qolǵa túsirdi. Egde jastaǵy kásipker áıeldi 9 aı buryn óltirgen qylmysker Ózbekstan Respýblıkasynyń aýmaǵynda tyǵylyp júrgen,
dep habarlady OQO ІІD-niń baspasóz qyzmeti.
Qylmys 2011 jylǵy 8 qarashada jasalǵan. Tańeteń qalalyq dámhanalardyń biriniń ıesi, egde jastaǵy (63 jastaǵy) kásipker áıeldiń máıiti tabyldy. Polıtsııa qyzmetkerleri oqıǵa ornyna kelip, qaraý barysynda páter ıesiniń ólimi moıyn tusynan, kókirek jáne ish tusynan shanshylyp-kesilip alǵan jaraqattarynyń saldarynan bolǵanyn anyqtady. Páterdi qaraý kezinde, krımınalıster páterdiń esiginiń buzylyp ashylmaǵanyn anyqtady. Jábirlenýshiniń týystary men áriptesteriniń aıtýy boıynsha, úıden altyn buıymdar, uıaly telefondar jáne bir top kiltter joǵalǵany anyqtaldy. Jáne de dámhanadaǵy kassadan aqsha joǵalǵan.
«Arada 9 aı ótkennen soń, jedel-izdestirý is-sharalarynyń kezinde, polıtsııa qyzmetkerleri, qazaqstan-reseı shekarasynan ótý kezinde, Oral qalasynda adam ólimine qatysy bar degen kúdikpen buryn sotty bolǵan, esh jerde jumys istemeıtin Ózbekstan Respýblıkasynyń 22 jasar er azamatyn qolǵa túsirdi», - dedi ІІD-niń baspasóz hatshysy Saltanat Qarakózova.
Tergeý júrgizý barysynda anyqtalǵandaı, oqıǵa bolǵan kúni saǵat tańǵy 6 shamasynda, kúdikti, buryn jábirlenýshiniń dámhanasynda birge jumys jasaǵan óziniń Ózbekstan Respýblıkasynyń azamaty 26 jasar týysymen, qaraqshylyq shabýyl jasaý maqsatynda, aldyn ala sóz baılasyp, páterdiń qasynda kútken. «Áıel páteriniń kireberis esigin ashqan ýaqytta, qapelimde úıine basa-kóktep kirip, jábirlenýshiniń betine birneshe ret uryp, bireýi áıeldiń moınynan jáne qolynan ustap, al ekinshisi ashana pyshaǵymen birneshe ret dene jaraqatyn salǵan, sońynda jábirlenýshiniń oqıǵa ornynda kóz jumǵany anyqtaldy», - dedi S. Qarakózova.
Úıinen aqsha taba almaǵan soń, onyń altyn buıymdaryn (saqına, syrǵalaryn), 3 uıaly telefonyn, kiltterin alyp ketken. Sodan soń, kúdiktiler jábirlenýshiniń dámhanasyna qaraı bet alyp, kiltpen esigin ashyp, 200 myń teńge aqshasyn alǵan. Qylmystyq qýdalaýdan jaltarý úshin, kúdiktiler Ózbekstan Respýblıkasynyń aýmaǵyna jasyrynǵan. Aıǵaqty zat retinde, ashana pyshaǵy jáne uıaly telefondar alyndy.
Osy jáıtke qatysty «Adam óltirý» jáne «Qaraqshylyq» baptary boıynsha qylmystyq is qozǵaldy. Kúdikti qamaýda. Polıtsııa qyzmetkerlerimen osy qylmysqa qatysy bar sybaılasyn ustaý sharalary júrgizilýde.
