Shymkentte Dúnıejúzilik qorshaǵan ortany qorǵaý kúni atalyp ótti

ShYMKENT. QazAqparat - Shymkentte Asanbaı Asqarov atyndaǵy dendrosaıabaqta Dúnıejúzilik qorshaǵan ortany qorǵaý kúni atalyp ótti. Sharada qala ákimi Ǵabıdolla Ábdirahymov quttyqtaý sóz sóılep, qalany kógaldandyrý jumystarynyń barysyn jetkizdi, dep habarlaıdy QazAqparat tilshisi.

Shahar basshysy qalanyń árbir turǵynyn aǵash egip, ony kútip-baptaýǵa shaqyrdy.

«Bul merekeniń shymqala úshin mańyzy erekshe. Óıtkeni, bizdiń Shymkent - jasyl jelekke oranǵan, kógildir qala. Biz ár jyly 100 myńǵa jýyq aǵash, 2 mln-nan astam gúl egemiz. 11 saıabaǵymyz bar. Bıyl 40 jyl tolǵaly otyrǵan dendrosaıabaqqa qoǵam qaıratkeri Asanbaı Asqarovtyń esimi berildi. Bul - tarıhı sát. Ár adam úshin 1 jylda 1 aǵash egilse, 1 mln aǵash ósip, qalany kógaldandyrýǵa úles qosar edi», - dedi qala ákimi.

Saıabaq sahnasynda ekologııalyq ortalyqtyń, mektep pen balabaqshalardyń qatysýymen merekelik kontsert ótti. Sondaı-aq, saıabaqta «Shymkent Plaza» saýda ortalyǵynyń demeýshiligimen balalar alańshasynyń saltanatty ashylý rásimi ótti.