Shymkentte dúkenderge shatyr arqyly kirgen ákki ury ustaldy
Abaı aýdandyq polıtsııa bólimine birdeı mazmunda úsh aryz túsken. Zardap shekkender – «Qaınar bulaq» saıajaıynyń aýmaǵynda ornalasqan dúken ıeleri. Saýda núktelerindegi urlyq túngi ýaqytta jasalǵan. Barlyq jaǵdaıda kúdikti ǵımarattardyń shatyryn ashyp, tóbeni buzý arqyly ishke kirgen.
Ury eki dúkenniń kassasynan jalpy somasy 130 myń teńge jymqyrady. Al, úshinshi kásipkerden smartfon, aqsha jáne sóredegi alkogoldik sýsyndar men temeki ónimderin qoldy etken. Oǵan keltirilgen shyǵyn 1 mln teńgeden astady.
Aǵa tergeýshi Bıbarys Bagov áriptesterimen birge qylmys oryndaryn, jábirlenýshilerdiń aıǵaqtaryn muqııat zerttep, barlyq kýágerlerden jaýap aldy. Beınebaqylaý kameralarynyń kómegimen polıtseıler kúdiktiniń jeke basyn anyqtady. Ol buryn osyǵan uqsas qylmys jasaǵany úshin jaýapkershilikke tartylǵan jergilikti turǵyn bolyp shyqty. Qabyldanǵan sharalardyń nátıjesinde jas jigit ustalyp, qamaýǵa alyndy.
Kúdiktiniń saıajaıdaǵy taǵy eki urlyqqa qatysy bar ekendigi anyqtaldy. Ol alǵashynda úı aýlasynan velosıped urlasa, keıin zeınetkerdiń úıinen uıaly telefony men kıim-keshekterdi jymqyrǵan.
QR QK-niń 188-baby 3-bóligi (Urlyq) boıynsha sotqa deıingi tergeý áreketteri júrgizilip jatyr. Aldaǵy ýaqytta is-qujattary barlyq jınalǵan dáleldemelermen sotqa joldanady.
