Shymkentte dollardyń qymbattaýyna qarsy sharalar qolǵa alyna bastady

ShYMKENT. QazAqparat - Shymkentte dollar baǵamynyń kóterilýine baılanysty baǵanyń ósýine jol bermeý sharalary qolǵa alyna bastady. Bul týraly qala ákimdiginiń resmı saıtynda jarııa etildi, dep habarlaıdy QazAqparat tilshisi.

Ákimdiktiń habarlaýynsha, jekelegen naryq sýbektileri túrli taýarlardyń, sonyń ishinde otandyq ónimderdiń baǵasyn jasandy túrde kóterý sııaqty ózge de túrli alypsatarlyq áreketteri oryn alýy múmkin. Osyndaı áreketke barǵandarǵa qatysty zań aıasynda tıisti sharalar qoldanylýy múmkin.

«Qazaqstan Respýblıkasy Ákimshilik quqyq buzýshylyq týraly kodeksiniń 159-babyna sáıkes, barlyq monopolııalyq kiristerdi (negizsiz alynǵan tabys) tárkileı otyryp, kiristerdiń (túsimderdiń) 3% -dan 5%-ǵa deıingi mólsherinde ákimshilik jaýapkershilik qarastyrylǵan. Kodekstiń 90-2-babynda monopolııaǵa qarsy organnyń mindetteriniń biri monopolııaǵa qarsy zańnamany buzýdyń aldyn alý bolyp tabylatyndyǵy kórsetilgen», delingen habarlamada.

Sonymen qatar, ákimdik qyzmetkerleri qala turǵyndarynan basqa naryq sýbektileriniń, sondaı-aq taýar baǵasynyń ósý oryn alǵan jaǵdaıda aqparattardy tıisti organdarǵa joldaý qajettigin eskertti.