Shymkentte daýyl taldy qulatyp, gaz qubyryn ajyratyp jibergen
ShYMKENT. QazAqparat - Shymkentte daýyl jelden shatyrlar ushyp, aǵashtar qulaýda. Qatty jel saldarynan keı jerlerde jaryq sónip qaldy. Oblystyq tótenshe jaǵdaılar departamenti baspasóz qyzmetiniń málimetinshe, aýa raıynyń qolaısyzdyǵyna baılanysty turǵyndardan birneshe shaǵym túsken, dep habarlaıdy QazAqparat tilshisi.
Atap aıtqanda, Shymkenttegi Qarasý shaǵyn aýdanyndaǵy kópqabatty turǵyn úıdiń shatyry ushyp ketken. Dál osyndaı jaǵdaı Shámshi Qaldaıaqov kóshesindegi Halyqqa qyzmet kórsetý ortalyǵynda da oryn alǵan. Al Ordabasy aýdany ortalyǵyndaǵy Mádenıet úıiniń ushqan shatyry 500 sharshy metrdi qurady. Shym shahardaǵy Ilıaev pen Sasbuqaev kóshelerinde de aǵashtar qulap, jol qozǵalysyna kedergi keltirgen. Qalanyń tazalyq qyzmetkerleri qulaǵan aǵashtardyń ornyn tazartyp, retke keltirýde.
Sondaı-aq Maılyqoja kóshesindegi turǵyn úılerdiń birinde tal qulap, gaz qubyryn ajyratyp jibergen.
Aıta keteıik, oblystyq ótenshe jaǵdaılar qyzmeti buǵan deıin jeldiń jyldamdyǵy sekýndyna 15-20 metrge jetetindigi týraly habarlama taratqan edi. Endi jel sekýndyna 25 metrge deıin jetetinin eskertýde. Oǵan qosa nóser jaýyn jaýyp jatyr. Sondyqtan turǵyndardy abaı bolýǵa shaqyrady.
