Shymkentte dástúrli ánshiler men kúıshiler baıqaýy ótti
ShYMKENT. QazAqparat - Shymkentte dástúrli ánshiler men kúıshiler baıqaýy ótti. Oblystyq deńgeıde uıymdastyrylǵan saıysqa mektep oqýshylary qatysyp, óz ónerlerin pash etti, dep habarlaıdy QazAqparat tilshisi.
Elbasy N.Nazarbaevtyń «Bolashaqqa baǵdar: rýhanı jańǵyrý» maqalasy aıasynda uıymdastyrylǵan is-shara «Ónerimdi elime arnaımyn» dep ataldy. Dástúrli án men terme jáne kúı ónerlerin nasıhattaýǵa baǵyttalǵan baıqaý oqýshylar arasynda alǵash ret uıymdastyrylyp otyr. Taǵylymdyq óner saıysynyń ótýine muryndyq bolǵan Oblystyq bilim basqarmasy mamandarynyń sózinshe bul baıqaý ata-salt dástúrin urpaq sanasyna sińirip, osy óner túrlerine balalardyń yntasyn oıatady.
Sondaı-aq jas jetkinshekterdiń talaptaryna dem beredi. Saıysqa qatysýshylar ár aýdannan iriktelip kelgen. Olar dombyra, qobyz, baıan, jetigen sekildi halyq aspaptarynda óner kórsetti. Jeńimpazdar ár nomınatsııa boıynsha marapattaldy. Al, bas júldeger dástúrli ándi nasıhattaıtyn respýblıkalyq baıqaýǵa joldama aldy.
