Shymkentte dárigerler ókpesiniń 90 paıyzy qabynǵan jańa bosanǵan áıeldi aman alyp qaldy

ShYMKENT. QazAqparat - Shymkentte 17 jeltoqsan kúni jas bosanǵan áıel aýyr halde perzenthanadan qalalyq juqpaly aýrýlar ortalyǵyna aýystyrylǵan. Túsken kezdegi jaǵdaıy óte aýyr bolǵan, ári óz betinshe demala almaǵan naýqasty dárigerler jansaqtaý bólimindegi ókpeni jasandy jeldetý apparatyna qosqan, dep habarlaıdy QazAqparat.

Kompıýterlik tomografııa nátıjesinde naýqas ókpesiniń 90% zaqymdalyp, ekijaqty pnevmonııa ekeni anyqtaldy.

Buǵan qosa PTsR saraptamasy boıynsha jańa bosanǵan áıelde Covid-19 vırýsy bar ekeni belgili bolady.

Naýqasta tynys jetispeýshiliginiń 3-dárejesi, aıqyn ıntoksıkatsııa sındromy, trombotsıttiń tómen bolýy syndy asqyný bolǵan.

1982 jylǵy áıelge dárigerler hattama boıynsha tolyq em kórsetip, antıkoagýlıantty jáne antıbakterıldi terapııa boıynsha kómek kórsetedi.

«Naýqastyń qazirgi jaǵdaıy jaqsy. Óz betinshe tynys alýda. Tynys alý jıiligi jaqsarǵan. Qandaǵy ottegi mólsheri - 98%. Qaıta jasalǵan kompıýterlik tomografııa qorytyndysy ókpe qabynýynyń 30%-ǵa azaıǵanyn kórsetti», - deıdi qalalyq juqpaly aýrýlar ortalyǵynyń akýsherlik bólimine jaýapty dáriger anestezıolog-reanımatolog Aıjan Beısengırova.

Qalalyq densaýlyq saqtaý basqarmasynyń mamandary búginde kelinshektiń densaýlyǵy jaqsaryp, 29 jeltoqsan kúni aýrýhanadan shyqqanyn habarlady.