Shymkentte dárigerler es-tússiz jatqan naýqastyń týystaryn izdestirýde
ShYMKENT. QazAqparat - Shymkentte dárigerler es-tússiz jatqan naýqastyń týystaryn izdestirýde. Aýyr dene jaraqattaryn alǵan er azamat Shymkent qalalyq jedel-járdem aýrýhanasyna 1 maýsym kúni túsken bolatyn. Sodan beri ol es-tússiz jatyr, dep habarlaıdy QazAqparat HAA tilshisi.
Ázirge aq halattylar naýqastyń kim ekendigin jáne qaıda turatyndyǵyn anyqtaı almaı otyr. Aýyr halde túsken er kisige bas-mı jaraqattaryna baılanysty qıyn ota jasalǵan. Búgin naýqastyń jatqanyna toǵyz kún ótse de ol áli esin jımapty. Dárigerlerdiń sózinshe, ol áli tilge kelmegen. Sondyqtan qala turǵyndarynan 55-60 jas shamasyndaǵy er kisini izdestirip júrgender bolsa atalǵan aýrýhanaǵa habarlasýlaryn suraıdy. 
