Shymkentte dári saqtaıtyn ǵımaratta jarylys bolyp, kúzetshi qaza tapty
Qalalyq Tótenshe jaǵdaılar departamenti baspasóz qyzmetiniń málimetinshe, órt týraly habarlama kúndizgi saǵat 11:36-da túsken. Órt sóndirýshiler jetken kezde jarylys saldarynan «Mej gospıtal 138 dárihana» JShS-ne qarasty 2 qabatty jeke turǵyn úıden órt shyqqany anyqtalǵan.
Ǵımarattyń jalpy aýdany 360 sharshy metrdi quraǵan. Qabyrǵalary kirpishten, shatyry gofr kartonmen qaptalǵan. Jarylys saldarynan 130 sharshy metr aýmaqta ǵımarat ishinara opyrylyp, 5 qabatty turǵyn úıdiń janyndaǵy páterdiń balkony men terezeleri, 7 avtokólik zaqymdanǵan. Jalyndy aýyzdyqtaýǵa TJD 37 qyzmetkeri jáne 9 birlik jumyldyrylǵan. Órt saǵat 12:06-da sóndirildi.
«Órt sóndirý kezinde Tótenshe jaǵdaılar departamentiniń kúshteri órt ornynan janyp ketken er adamnyń máıitin tapty. Onyń kim ekeni anyqtalyp jatyr. Adyn ala boljam boıynsha kúzetshi bolýy múmkin. Qazir Jarylystyń sebebi anyqtalyp jatyr, tótenshe jaǵdaıdyń saldarymen kúres jumystary jalǵasýda»,- delingen habarlamada.
Oqıǵa ornyna sondaı-aq, Shymkent qalasy Polıtsııa departamenti basshylyǵy men jedel-tergeý toby shyqqan. Jarylys bolǵan aýrýhanaaralyq dárihana ǵımaratynyń tolyq joıylǵanyn anyqtap, onda tuzdy eritindi óndiriletini anyqtaldy.
«Jarylys nátıjesinde paıda bolǵan órtti TJD qyzmetkerleri tolyǵymen sóndirdi. Aldyn-ala málimetter boıynsha, jarylystyń sebebi gazdyń jınalýynan bolǵan. Polıtseıler oqıǵanyń mán-jaıyn anyqtap jatyr», - delingen Shymkent qalalyq PD baspasóz qyzmetiniń habarlamasynda.
Áleýmettik jelilerde taraǵan beınejazbalarda sol ǵımarattardyń mańynda turǵan kólikterge zaqym kelgeni túsirilgen. Sondaı-aq, jaraqat alǵan adamdardy alyp ketip bara jatqanyn kórýge bolady.