Shymkentte dári-dármektiń bir aılyq qory jasaqtaldy - ákim

NUR-SULTAN. QazAqparat – Shymkent qalasynyń ákimi Murat Áıtenov dári-dármekti zańsyz satýshylarmen kúres qalaı júrip jatqanyn aıtyp berdi, dep habarlaıdy QazAqparat tilshisi.

«Memleket basshysynyń halyqty dári-dármekpen qamtý jónindegi tapsyrmasyna sáıkes qalada tórt monıtorıng toby qurylyp, 348 dárihanaǵa tekserý júrgizildi. Nátıjesinde dári-dármek satýmen aınalysqan 50 adam anyqtaldy. Onyń ishinde 12 qylmystyq is tirkelip, tergeý amaldary bastaldy. Qalada kóterme dári-dármek satýmen aınalysatyn 10 iri farmkompanııa 560 dárihanaǵa jumys isteıdi. Shetelden dári-dármek alyp kelýge 10 farmkompanııaǵa ruqsat beriledi», - dedi Murat Áıtenov Úkimet otyrysynda.

Ákimniń aıtýynsha, bir ushaq, 10 fýramen Úndistan, Reseı, Ýkraına jáne Ózbekstannan 2 mln 676 myń flakon birinshi kezektegi dári-dármek jáne 16 mln 700 myń maska jetkizilgen.

«Qala qoımalarynda bir aılyq dáriniń qory jasaqtaldy. Koronavırýspen kúresti turaqty baqylaýda ustaý úshin qala ákimdiginde ahýal ortalyǵy bar», - dedi ol.