Shymkentte dári-dármek shyǵaratyn taǵy bir zaýyt salynady
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev búgin Birikken Arab Ámirliginiń úkimet múshesi sheıh Hassan Abdýlkarım Habıb Mansýr Alherz myrza bastaǵan bir top otandyq kásipkerlermen kezdesti.
Eýropalyq «BITONFLY» fırmasy jáne ońtústikqazaqstandyq «Nuray pharmaceuticals» JShS men «Aquacrystal Croup» kompanııalarynyń basshylary oblys ákimine birlesip iske asyrǵaly otyrǵan bıznes jobalaryn tanystyrdy. Birlesken kásipkerlik top bıylǵy jyly Shymkentten dári-dármek pen medıtsınalyq qoldanǵysh zattar shyǵaratyn zaýyt ashqaly otyrǵanyn jetkizdi, dep habarlaıdy QazAqparat HAA tilshisi.
Jobanyń quny 34 mln AQSh dollaryn quraıdy. Dári-dármektiń 50 túrin shyǵarýǵa nıettenip otyrǵan kompanııa basshylyǵy «Tassaı» ındýstrıaldy aımaǵynan 7 gektarǵa jýyq jer telimin berýdi ótindi. Sondaı-aq olar Shymkent qalasyndaǵy «Sofia Towers» jáne «Arman» turǵyn úı jáne saýda ortalyqtarynyń qurylysyn bastaǵaly otyrǵanyn baıandady. Birneshe jyldan beri qurylysy toqtap turǵan qos keshenniń irgetasy aldaǵy mamyr aıynda qalanǵaly otyr. Kásipkerler bul jobalardy Birikken Arab ámirligimen birlesip iske asyrady. Qurylysqa baǵyttalatyn ınvestıtsııanyń 60 paıyzyn arab kásipkerleri quımaqshy eken.
Kásipkerlerdiń jobalarymen tanysqan aımaq basshysy qolǵa alynǵan jobalardy aıaqsyz qaldyrmaı, mejelengen merzimde bitirýge shaqyrdy.
«Jobalaryńyz jaqsy. Dári-dármek shyǵaratyn zaýyttaryńyzǵa «Tassaı» ındýstrıaldy aımaǵynan jer bólýge kómektesemiz. D. Qonaev dańǵylynda boı kóteretin «Sofia Towers» turǵyn úı kesheni men Adyrbekov kóshesinde ornalasqan «Arman» turǵyn keshenin de merzimnen kesheýildetpeı aıaqtaý kerek. Birikken Arab Ámirligindegi qarjylyq uıymmen birlesip kelisimge qol qoıyp otyr ekensizder. Sáttilik tileımiz. Eń bastysy - qolǵa alynǵan jumys júıeli ári sapaly atqarylýy kerek» , - dedi Janseıit Qanseıituly.
Óz kezeginde Birikken Arab Ámirliginiń úkimet múshesi sheıh Hassan Abdýlkarım Habıb myrza oblys ákimine alǵysyn bildirip, jobalardy qarjylandyrýda qolbaılaý bolmaıtyndyǵyn jetkizdi.
«Ýaqyt bólip arnaıy qabyldaǵanyńyzǵa alǵysym sheksiz. Ońtústik Qazaqstan oblysynyń áleýetimen tanysyp shyǵyp, keremet áser aldym. Qazaqstandyq kásipkerlermen birigip, osy óńirde birqatar jobalardy qolǵa alǵaly otyrmyz. Alǵa qoıǵan maqsat-mindetter joǵary deńgeıde oryndalady degen senim mol», - dedi sheıh Hassan Abdýlkarım Habıb Mansýr Alherz.
Kezdesý sońynda aımaq basshysy Arab elinen kelgen arnaıy qonaq pen otandyq kásipkerlerdi «Shymsıtı» jobasymen tanystyryp, usynys-pikirleri eskeriletinin jetkizdi.
