Shymkentte dámhanadan ýlanǵan 3 jasar qyz aýrýhanada qaıtys boldy
Dárigerlerdiń málimetinshe, 2015 jyly týǵan búldirshin aýrýhanaǵa 9-shy qyrkúıek kúni saǵat 10.55-te jedel járdem qyzmetimen jetkizilgen. Onyń ishi aýyryp, qusa bergen. Qabyldaý bólimindegi dárigerler balanyń jaǵdaıy ortasha deńgeıde ekenin anyqtaıdy. Alaıda búldirshinniń ájesi ony aýrýhanaǵa jatqyzýdan bas tartady. Osy kúni saǵat 14.24-te balaǵa qaıtadan jedel járdem shaqyrtylady. Ol kezde de ájesi aýrýhanaǵa jatqyzýdan bas tartyp, tipti tilhatqa qol qoıyp bergen. Dál sol kúni saǵat 16:55-te atalǵan aýrýhanaǵa ózderi kelip, naýqas bala jatqyzylǵan. Ol kezde «Tamaqtan ýlaný toksokoınfektsııasy» dıagnozy qoıylǵan.
«Túsken kezdegi shaǵymy: táýligine 5-6 ret qusý, álsizdik, tábettiń bolmaýy. Atalǵan aýrýdy bir kún buryn dámhanadan jegen pıtstsa, sýshı jáne sútti kokteıl ishýmen baılanystyrǵan. Balanyń anasy da birdeı ýaqytta aýyrǵan, Shymkent qalalyq juqpaly aýrýlar aýrýhanasynda em alǵan.
10-shy qyrkúıek kúni saǵat 21:10-da balanyń jaǵdaıynyń nasharlaýyna baılanysty, ol reanımatsııalyq bólimge aýystyrylǵan. 10-y kúni saǵat 22:30-da IVL-terapııa men júregine qaıta tiriltý jasalýyna qaramastan, qyzdyń júrek soǵysy toqtaıdy. Reanımatsııalyq jumystar oń nátıje bermegen.
Klınıkalyq negizgi dıagnozy: «Sepsıs, septıtsemııa». Asqynýlar: «JJÓJ. Bas mıynyń qabynýy, 3-dárejeli septıkalyq shok». Nátıjesinde K esimdi qyz bala qalalyq juqpaly aýrýlar aýrýhanasynda 10-shy qyrkúıek kúni jan tapsyrǵan»,- delingen habarlamada.
Osydan keıin týystary patologııalyq-anatomııalyq tekserý ótkizýden bas tartyp, balanyń denesin alyp ketken. Medıtsına qyzmetkerlerine eshqandaı shaǵymy joq ekeni týraly qolhat jazyp qaldyrǵan.
Qazirgi tańda qalalyq Densaýlyq saqtaý basqarmasynyń buıryǵymen Qoǵamdyq densaýlyq saqtaý komıtetiniń OQO boıynsha departamenti tarapynan atalǵan jaǵdaıǵa qatysty qyzmettik tekserý jumystary bastaldy. Ákimdiktegiler tekserý nátıjesi qosymsha habarlanatynyn jetkizdi.