Shymkentte býrger ortalyǵy órtendi
ShYMKENT. QazAqparat – Shymkentte kópqabatty úıdiń astyndaǵy «Baqyt býrger» jedel taǵam daıyndaý ortalyǵy órtenip, turǵyndar qaýipsiz jerge kóshirildi, dep habarlaıdy QazAqparat tilshisi.
Qalalyq TJD baspasóz qyzmetiniń málimetinshe, órt keshki saǵat 19:38-de Respýblıka dańǵylyndaǵy ortalyqtan shyqqan. Órttiń jalpy aýmaǵy 180 sharshy metrdi qurap, oqıǵa ornyna qalalyq órt sóndirý qyzmetiniń jeke quramynan 30 adam jáne 8 órt sóndirý tehnıkasy jumyldyrylǵan. Qaýipsizdik tehnıkasyn saqtaı otyryp, elektr qýaty ajyratylǵan.
«Órt saǵat 20:24 tolyqtaı sóndirilgen. Jalyn jalpy aýmaǵy 180 sharshy metrdi sharpyp, ǵımarattyń biraz bóligi janyp ketken. Qazirgi tańda keltirilgen materıaldyq shyǵynnyń kólemi men órttiń sebepteri anyqtalýda» delingen habarlamada.
