Shymkentte búgin dabyl soǵyldy
ShYMKENT. QazAqparat - Shymkentte búgin tańerteń dabyl soǵyldy. Óńirdiń tótenshe jaǵdaılar qyzmetkerleri osylaısha Shymkentte «Qonys - 2017» respýblıkalyq komandalyq-shtabtyq oqý jattyǵýyn bastap ketti, dep habarlaıdy QazAqparat tilshisi.
Aýqymdy shara tabıǵı joıqyn kúshi bar tótenshe jaǵdaılar kezinde iri qalanyń halqyn evakýatsııalaýǵa basqarý organdaryn jáne azamattyq qorǵaý kúshterin daıyndaý jáne Azamattyq qorǵaý memlekettik júıesin jetildirý maqsatynda uıymdastyryldy.
Jattyǵý aıasynda mamandar dabyl soǵý arqyly baılanys jáne qulaqtandyrý júıesiniń daıyndyǵyn tekserip aldy. Halyqty tabıǵı joıqyn kúshi bar tótenshe jaǵdaılar kezindegi is-qımyldarǵa, onyń ishinde evakýatsııalyq is-sharalardy ótkizý tártibine oqytý men túsindirme jumystaryn ótkizdi. Jalpy jattyǵýǵa jergilikti atqarýshy organdar men qalanyń azamattyq qorǵaý qyzmeti, bilim berý men densaýlyq saqtaý nysandary, sondaı-aq qala turǵyndary qatysýda.
Oqý-jattyǵý aıasynda tús aýa birqatar praktıkalyq is-sharalar atqarylady dep josparlanǵan. Atap aıtqanda Nursát móltek aýdanynda joǵarǵy qabatty turǵyn úılerden evakýatsııalaý jumystary júrgiziledi. Qaladaǵy №58 mektepte jınalý-evakýatsııalaý pýnktiniń jumysy kórsetiledi dep kútilýde.
