Shymkentte Brıtan ýnıversıtetiniń kampýsy salynýy múmkin

ShYMKENT. QazAqparat - Shymkent qalasynyń ákimi Ǵabıdolla Ábdirahymov Ulybrıtanııa jáne Soltústik Irlandııa Birikken Koroldiginiӊ Qazaqstan Respýblıkasyndaǵy Tótenshe jáne Ókiletti Elshisi Maıkl Djon Gıffordpen kezdesti. Taraptar ekijaqty yntymaqtastyq pen qalanyń damý áleýeti jáne ınvestıtsııa tartý máselelerin talqylady, dep habarlaıdy QazAqparat tilshisi.

Qala ákimi Qazaqstan men Ulybrıtanııa arasynda tyǵyz jáne senimdi qarym-qatynas qalyptasqanyn aıtyp, Ulybrıtanııa saýda aınalymy boıynsha Qazaqstannyń on saýda seriktesiniń qatarynda ekenin atap ótti. Sonymen qatar, Birikken Koroldik Qazaqstandaǵy iri ınvestorlardyń arasynda altynshy orynda ekenin jetkizdi.

Shymkent - Ortalyq Azııadaǵy eń tartymdy qalalardyń biri jáne negizgi tranzıttik dálizderdi baılanystyratyn iri kólik haby ekenin aıtqan Ǵ.Ábdirahymov brıtandyq kompanııalardy aqparattyq tehnologııalar, tsıfrlandyrý, sondaı-aq SmartCity bastamalaryna ınvestıtsııa salýǵa shaqyrdy.

Kezdesýden keıin qonaqtar «Shymkent» áleýmettik-kásipkerlik korporatsııasyna bardy. Taraptar ónerkásip, qurylys, aýyl sharýashylyǵy, tsıfrlandyrý jáne bilim salalaryndaǵy yntymaqtastyq múmkindikterin talqylady. Maıkl Gıfford myrza Shymkentte Brıtan ýnıversıtetiniń kampýsyn salý jospary bar ekenin aıtty. Óz kezeginde Rashıd Aıýpov úshinshi megapolıstiń ınvestıtsııalyq tartymdylyǵy jáne Shymkentti damytý boıynsha ÁKK-niń iri josparlary týraly baıandady.