Shymkentte boıjetkenge qol jumsaǵan polıtseı jazadan qutylyp ketti
ShYMKENT. QazAqparat - Shymkentte boıjetkenge qol jumsaǵan polıtseı jazadan qutylyp ketti. Bul týraly Oblystyq jergilikti polıtsııa qyzmetiniń bastyǵy Ábdiǵanı Seıdýalıev málimdedi, dep habarlaıdy QazAqparat tilshisi.
Jergilikti polıtsııa bastyǵynyń sózinshe, boıjetkenge qol kótergen tártip saqshysyna qatysty júrgizilgen tekseristiń nátıjesi onyń jazyqsyz ekenin kórsetken. Sebebi, dámhananyń aldynda shý shyǵarǵan boıjetken aıtqanǵa baǵynbaı, bılik ókiline qarsylyq tanytqan. Tipti polıtseıdiń pogonyn julyp tastaǵany dáleldendi.
«Ol jerde bizdiń qyzmetkerler tarapynan zań buzýshylyq oryn alǵan joq. Barlyǵyńyz da kórip otyrsyzdar. Pogonyn julyp alyp, ony betine laqtyryp, balaǵattaǵan. Sol jóninde jańaǵy azamattardyń ústinen qylmystyq is qozǵaldy. Qazirgi tańda sotqa deıingi tergep-tekserý amaldary júrip jatyr. Al, bizdiń qyzmetkerlerge qatysty qyzmettik tekseris júrgizilip, kinásiz ekeni anyqtaldy», - dedi Ábdiǵanı Seıdýalıev.
Eske salaıyq, keleńsiz jaǵdaı qyrkúıek aıynyń 27-si kúni Shymkenttiń ortalyǵynda oryn alǵan bolatyn. Dámhanalardyń birinde spırttik ishimdik ishken qyz ben jigit janjal shyǵarǵan. Sóıtip, meıramhana qyzmetkerleri polıtsııa shaqyrtýǵa májbúr bolypty. Oqıǵa ornyna jetken polıtseıler tártip buzǵandardyń birin alyp ketpek bolǵanda, janyndaǵy qyz qarsylyq kórsetken. Tipti bılik ókiline qol jumsap, pogonyn julyp alǵan bolatyn. Osy kezde polıtseı de boıjetkenge qol kótergen edi. Bul beınetúsirilim áleýmettik jelilerge tarap, kóriniske jurt túrli pikir bildirgen-di.
