Shymkentte boıjetkendi ishinen uryp qulatqan polıtseıge qatysty qyzmettik tekseris bastaldy

Bul týraly búgin qalalyq jergilikti patrýldik polıtsııa bastyǵy Danııar Meıirhan málimdedi, dep habarlaıdy QazAqparat HAA tilshisi.

Shymkent qalalyq JPP bastyǵynyń sózinshe, dámhanada tóbeles bolǵan. Artynsha eki boıjetken «102» nómirine habarlasyp, ózderin belgisiz azamattyń urǵanyn aıtqan.

«Oqıǵa ornyna jetken tártip saqshylary boıjetkenderge qol kótergen 26 jastaǵy azamat pen onyń janyndaǵy azamatshalardy kólikke mingizip, polıtsııa bólimshesine jetkizbek bolady. Alaıda ustalǵan azamat  ishki ister qyzmetkerleriniń aıtqanyna baǵynbaı, qarsylyq kórsetedi. Tipti olarǵa qol kótergen. Keıinnen jas jigitke onyń janyndaǵy qyz jaqtaspaq bolady. Kýágerler túsirgen beınetúsirilimde polıtsııa qyzmetkeriniń qyzǵa qol kótergeni túsip qalǵan. Qazirgi tańda qaqtyǵysqa qatysqandardyń barlyǵynyń jeke tulǵalary anyqtalyp, kýágerlerden beınetúsirilimder alynyp jatyr. Jetondardaǵy, dámhanada ornalasqan baqylaý kamerasyndaǵy beınetúsirilimder anyqtalyp, zertteledi. Shymkenttik Jergilikti polıtsııa qyzmeti óz qyzmetkeriniń áreketin aqtamaıdy. Qyzmetkerlerge qatysty áreketteriniń zańdylyǵyn anyqtaý úshin qyzmettik tekseris júrip jatyr. Nátıjesin habarlaımyz", - deıdi Danııar Meıirhan. 

Ol sondaı-aq polıtsııa qyzmetkerleri 26 jastaǵy kúdiktiniń bir qyzdy betinen urǵanyn, ekinshisiniń shashyn julǵanyn anyqtaǵanyn aıtady. Alaıda kúdiktini ustaý kezinde janyndaǵy boıjetken tártip saqshylaryna qol jumsap, bylapyt sózder aıtty dep otyr.

«Ekinshi kýágerlerdiń beınetúsiriliminde qyzdyń tártip saqshylaryna jaman sózder aıtqany kórinip tur. Boıjetken tipti ishki ister qyzmetkerlerine qarsy shyǵyp, olardyń pogondaryn julyp alǵan. Pogondaryn kóshege laqtyrǵan. Dese de boıjetkenniń bul áreketine qatysty endi tıisti sharalar qarastyrylatyn bolady. Sondaı-aq osy oqıǵa boıynsha qazir Qylmystyq Kodekstiń 293- «Buzaqylyq» jáne 380-« Bılik ókiline qatysty kúsh qoldaný» baptarymen is qozǵalyp, sotqa deıingi tergeý amaldary júrgizilýde. Kúdikti ýaqytsha ustaý abaqtysyna qamaldy»,- deıdi Shymkent qalalyq JPP bastyǵy.

Aıta keteıik, keshe tańerteń Shymkenttegi dámhanalardyń biriniń aldynda polıtseıler men jastardyń arasynda tóbeles bolǵan edi. Onda polıtseı boıjetkenderdiń biriniń ishinen uryp jibergen. Saldarynan qyz ishin ustap, otyryp qalǵan bolatyn. Bul kórinisti kýágerlerdiń biri uıaly telefonyna túsirip alyp, áleýmettik jelige salǵan.