Shymkentte bos laýazymdar jármeńkesi ótti
ShYMKENT. QazAqparat - Shymkentte bos laýazymdar jármeńkesi ótti. Jumys izdep kelgenderge Shymkent qalasy ákimdiginiń bos oryndary usynylyp, memlekettik ákimshilik qyzmetke ornalasýdyń joly túsindirildi, dep habarlaıdy QazAqparat tilshisi.
Jumys berýshiler kelýshilerge birneshe talap qoıdy. Eń aldymen Qazaqstannyń zańnamalaryn bilýi jáne jeke qasıetterin baǵalaýǵa arnalǵan testten ótýi tıis. Odan keıin memlekettik organ jarııalaǵan konkýrsqa qatysýy shart. Sonan soń arnaıy komıssııada áńgimelesýden ótip, oń qorytyndy alsa jumysqa qabyldanady. Kadr tańdaýda sondaı-aq úmitkerdiń iskerligi men biliktiligine de asa mán beriledi.
Jármeńkege kelgenderdiń qatarynda joǵarǵy oqý oryndaryn bıyl támamdaǵan túlekter kóp. Basym bóligi memlekettik qyzmetshilerdiń «B» korpýsyna qyzyǵýshylyq tanytty. Olarǵa qaladaǵy bos memlekettik ákimshilik laýazymdar tizimi de usynyldy.
