Shymkentte bıyl 6 sport nysany paıdalanýǵa beriledi
Saıram turǵyn úı alabyndaǵy №12 sport mektebiniń qosymsha korpýsynyń qurylysy jyl sońyna deıin aıaqtalady dep josparlanyp otyr. Munda sporttyń 12 túri úshin jattyǵý protsesin uıymdastyrýǵa múmkindik artady. Nysan bir mezgilde 160 sportshyny qabyldaı alady.
«Qazir 868 oqýshy sport mektebinde jattyǵý jasap júr. Kelem deýshiler kóp, biraq barlyǵyn qabyldaýǵa múmkinshiligimiz joq. Sondyqtan renjip ketetinder de bar. Qosymsha korpýs bitken soń, úıirmeler sanyn kóbeıtemiz dep josparlap otyrmyz», - deıdi sport mektebiniń dırektory Hassan Makkambaev.
Shymqalada qaıqa qurý jumystarynan ótip jatqan «Metallýrg» stadıony da qarasha aıynda el ıgiligine paıdalanýǵa berilmek. Munda komandalyq oıyndarǵa arnalǵan sportzaldar, 62 orynǵa arnalǵan sportshylar úıi, 1504 orynǵa arnalǵan jankúıerler oryny, komandalyq kıim aýystyrý bólmeleri jáne zamanaýı stadıon ornalasatyn bolady. Sondaı-aq, trenajerler alańshasy men sporttyq oıyndar alańshalary ornatylady.
Munan bólek demeýshiler esebinen 4 nysannyń qurylysy júrýde. Olardyń ishinde ústel tennısine arnalǵan ortalyq, jańa ıppodrom jáne «Turan GHA» sport nysany men «sport life» fýtbol alańy bar.
«Bozaryq shaǵyn aýdanynda jańa atshabardyń qurylysy júrip jatyr. Jalpy aýmaǵy 39 gektar. Kólemi eski ıppodromnan eki ese úlken. Onda at sportyna arnalǵan arnaıy alańdar bolady. Barshasy zamanaýı stılde salynady. Jankúıerlerge arnalǵan 1500 oryn jasalýda. Nysan qyrkúıek aıynda qoldanysqa beriledi», - deıdi Shymkent qalalyq dene shynyqtyrý jáne sport basqarmasy basshysynyń orynbasary Ersek Dármenov.
Jalpy qalada buqaralyq sportty damytý úshin bıyl 54 sport alańshasynyń qurylysy salynady. Onyń 25-i Abaı aýdanynda, 9-y Ál-Farabı aýdanynda, 10-ny Eńbekshi aýdanynda salynsa, taǵy 10-ny Qarataý aýdanynda.