Shymkentte birqatar jolaýshy tasymaldaýshy kompanııalarmen kelisimshart buzyldy
ShYMKENT. QazAqparat - Shymkentte jolaýshy tasymaldaýmen aınalysatyn 28 kólik kompanııasynyń 14 baǵyty boıynsha kelisimshart buzyldy. Oǵan qoǵamdyq kólikterdiń tıisti talaptardy oryndamaýy sebep bolǵan. Bul týraly qala ákiminiń kólik kompanııasy basshylarymen kezdesýinde aıtyldy, - dep habarlaıdy «QazAqparat» HAA tilshisi.
Jıynda qoǵamdyq kólik júrgizýshileri tarapynan oryn alatyn kemshilikter aıtyldy. Kún saıyn baǵytqa 1 100-den astam avtobýs shyqsa, olardyń basym kópshiligi jol erejeleri men tıisti talaptardy saqtamaıdy. Júrgizýshiler avtobýstardyń tazalyǵyna qaraýdyń ornyna bir-birimen báıgege túsip jarysady. Al kondýktorlar dóreki minez kórsetip, jolaýshylarǵa tıisti deńgeıde qyzmet kórsetpeıdi. Qala berdi qala irgesindegi birqatar eldimekenderge avtobýstar qatynaý jaǵy kemshin tússe, demalys kúnderi olardyń qatary múldem azaıyp ketedi. Mundaı olqylyqtardy qalanyń osy salaǵa jaýapty mamandary jaıyp saldy.
«Jolaýshylar qaýipsizdigin saqtaý maqsatynda 97 reıd ótkizdik. Sonyń nátıjesinde kólik kompanııalaryna resmı túrde 197 ret eskertý jasalyp, aıyppuldar salyndy. Biraq ózgeris joq. Endi tıisti talaptarǵa qoǵamdyq kóliktiń júrgizýshisi bir jylda eki ret jol erejesin buzsa, júrgizýshi kýáliginen aıyrylady dep engizý kerek», - dedi Shymkent qalalyq jolaýshylar kóligi jáne avtomobıl joldary bóliminiń basshysy Qýatjan Jumataev.
Óz kezeginde shahar basshysy Ǵabıdolla Ábdirahymov ta jolaýshylar tasymalymen aınalysatyn kompanııalardyń jumysyn synǵa alyp, avtobýs júrgizýshileriniń jumysyn retke keltirý kerek ekenin eskertti.
«Avtobýstar kez-kelgen jerge toqtaı salady. Ashyq esiktermen júredi. Eń bastysy - adam ómiri ekenin umytpaý kerek. Sodan keıin basqa qalalarda qoǵamdyq kólikter ret-retimen júredi. Al bizdegi aıaldamalarda bir mezette bes-altaýy keledi de, on bes mınýt joq bolyp ketedi. Osy jaǵy nege rettelmeıdi?», - dedi qala ákimi.
Bul máselege oraı kólik kompanııalarynyń basshylary da óz ýájderin aıtyp qaldy. Qala ákimdigine qarasty kólik bólimi men dıspetcherlik beketterdiń jumystaryna kóńilderi tolmaıtyn atap ótip, jolaýshylar tasymaldaýshylar úshin qoıylǵan talaptarǵa ózgerister engizýdi usyndy. Sebebi ózge qalalarda ereje birdeı bolsa, Shymkentte shendileri ony jıi ózgerte beredi eken. Al, ol talaptardy oryndaý tasymaldaýshy kompanııalarǵa qıynǵa soǵyp otyr.
«Tıisti erejede jylyna avtoparktiń keminde 20 paıyzyn jańartyp otyrý kerek deıdi. Biz tabystan góri shyǵynymyz kóbeıip turǵan ýaqytta olardy qalaı jańartpaqpyz. Janar-jaǵar maı men qajetti bólshekter kúndelikti qymbattaýda. Ony eskerip jatqan eshkim joq. Al qaladaǵy kóshelerdiń sapasy syn kótermeıdi. Saldarynan júrgizýshiler kóligin jóndeımiz dep turyp qalady. Tabystan qaǵylýda. Buryn mundaı máselelerge saraptama jasalatyn. Qazir ondaı jasalmaıdy», - dedi «ıÝjavtotrans» qaýymdastyǵynyń tóraǵasy Darhan Qaıýpov.
Qalaı bolǵanda da, jolaýshy tasymaldaýshy kompanııalar qala basshylyǵynyń 14 baǵyt boıynsha kelisim-shartty buzý jónindegi birjaqty sheshimimen keliskisi joq. Qazirdiń ózinde oblystyq ekonomıkalyq sotqa talap-aryz berip qoıypty.
