Shymkentte Birikken Arab Ámirlikteriniń bas konsýldyǵy ashylady
Shymkent qalalyq Týrızm jáne syrtqy baılanystar basqarmasynyń basshysy Erlan Qydyrov baspasóz máslıhatynda málim etkendeı, atalǵan másele Qazaqstan Respýblıkasy Syrtqy ister mınıstrligmen jáne BAÁ-niń Qazaqstandaǵy elshiligimen birlese júrgizilmek.
Erlan Qydyrovtyń sózinshe, Shymkenttiń ınvestıtsııalyq tartymdylyǵyn nasıhattaý, týrıstik áleýetin tanystyrý maqsatynda syrtqy baılanystardy damytýdyń mańyzy zor. Osy rette, sheteldik dıplomatııa ókilderimen jáne kompanııalarmen de birshama nátıjeli kezdesýler ótken. Qazirgi tańda Shymkent 10 qalamen baýyrlas qatynas ornatsa, jyl sońyna deıin qosymsha 7 qalamen yntymaqtastyq qurý josparlanǵan. Onyń ishinde Qytaıdyń Dalıan jáne Sııan, Italııanyń Genýıa qalasy, Ázerbaıjannyń Gıandja qalasy, Lıtvanyń Kaýnas qalasy, Bolgarııanyń Plovdıv qalasy, Tatarstannyń Qazan qalalary bar.
«Birinshi jartyjyldyqta Naýryz jáne Qala kúni sııaqty merekeler aıasynda «DámDásTour», «Balmuzdaq fest» gastronomııalyq festıvalderinen turatyn oqıǵalar qataryn qalyptastyrýǵa basa nazar aýdarsaq, al kúzde talantty jastar men týrıstik bıznesti qoldaý úshin ımıdjdik is-sharalar qurýda úlken josparlarymyz bar. Osy kezeńde «Shymkent Mobilography Fest» festıvalin, «Shymkent Tourism Awards» konkýrsyn, tsıtadelde lazerlik shoý, qolónershilerdi qoldaý aıasynda «Etno Shymkent» festıvalin ótkizýdi josparlap otyrmyz», - dedi basqarma basshysy.
Bıylǵy alty aıda Shymkent qalasyna saparlaǵan týrıster sany 216 249 adamdy quraǵan. Al «ekspress-statıstıkalyq» aqparatqa sáıkes 9 aıda shaharǵa 300 myńǵa jýyq týrıst keletini kútilip otyr. Jalpy týrısterdi qabyldaý kórsetkishi boıynsha Shymkent qalasy respýblıkada Almaty men Nur-Sultan qalalarynan keıingi úshinshi orynda tur.
