Shymkentte bir jylda 4 myńnan astam otbasy baspanaly boldy
ShYMKENT. QazAqparat - Shymkentte ótken jyly 4 myńnan astam otbasy baspanaly boldy. Paıdalanýǵa berilgen turǵyn úıdiń kólemi 402 myń sharshy metrdi qurap, 36 paıyzǵa óskenin kórsetip otyr, dep habarlaıdy QazAqparat tilshisi.
Qala turǵyndary aldynda esep bergen shahar basshysy Nurlan Saýranbaev «Óńirlerdi damytý - 2020» memlekettik baǵdarlamasy aıasynda atqarylyp jatqan jumystarǵa da toqtalyp ótti.
«Atalǵan baǵdarlama aıasynda 21 kópqabatty úıge jańartý jáne jóndeý jumystary júrgizildi. Jeti úıge seısmıkalyq kúsheıtý jumystary atqarylyp, demeýshilerdiń esebinen 33 kópqabatty ǵımarattyń qasbeti jóndeldi»,-dedi qala ákimi.
Jıynda sonymen qatar qala kóshelerin jaryqtandyrý máselesi de sóz boldy. Turǵyndar jańadan salynǵan shaǵynaýdandarda tún jarymda júrý qıyndyǵyn aıtyp, ásirese mektep jasyndaǵy balalar sabaqtan qaıtqanda ýaıymdaıtynyn alǵa tartty. Bul máselege oraı ákim kósheler kezeń-kezeńimen jaryqtandyrylady dep ýáde etti.
«Aǵymdaǵy jyly qala kóshelerin jaryqtandyrý jumystary jalǵasady. 23 kóshege, ıaǵnı buryn eshqandaı sham ornatylmaǵan kóshelerge jaryqtandyrý júıesi tartylady. Tórt kóshede qaıta qurý jumystary júrgizilip, shet aımaqtardaǵy 43 kóshege jaryqsham ornatýǵa jobalyq-smetalyq qujattar ázirlenýde»,- dedi Nurlan Saýranbaev.
