Shymkentte bir jylda 13 adam óndiristik jaraqattan kóz jumdy
Óndiristik orynda jaraqat alǵandardyń 13-i mert bolǵan. Bul týraly búgin qalalyq Eńbek ınspektsııasy jáne kóshi qon basqarmasynyń basshysy Baýyrjan Qaljanov aıtty.
Qalanyń bas memlekettik eńbek ınspektorynyń aıtýynsha, jazataıym oqıǵalardyń tirkelýine jol qozǵalysy erejeleriniń buzylýy, zardap shegýshiniń abaısyzdyǵy men tehnologııalyq protsesterdiń buzylýy sebep bolǵan. Sondaı-aq, qyzmetkerlerdiń jeke qorǵaný quraldaryn paıdalanbaýy men belgilengen eńbek rejıminiń buzylýy da jumysshylardyń jaraqat alýyna alyp kelgen. Budan bólek basqarmaǵa jyl basynan beri azamattardan túrli máseleler boıynsha 238 aryz-shaǵym túsken. Brıfıngte 6 kásiporynnyń 27 mln teńge jalaqy qaryz ekenin aıtqan basqarma basshysy ótken jylǵy bul kórsetkish 192,8 mln teńgeni quraǵanyn aıtty.
«Qazirgi tańda azamattyǵyn alyp úlgermegen oralmandardyń jumysqa ornalasýy qıyndap tur. Sebebi «oralman» statýsy 1 jylǵa ǵana beriledi. Belgili sebepterge oraı osy ýaqyt aralyǵynda azamattyq alýǵa qujat rásimdep úlgermegender úshin 6 aı taǵy qosymsha ýaqyt beriledi. Ókinishke oraı, osy ýaqytty da paıdalanbaǵan azamattar bar. Sondyqtan, osy azamattarǵa 2019 jyldyń 31 jeltoqsanyna deıin taǵy da qosymsha ýaqyt berilip otyr. Osyny eskerip, olar qujattaryn rásimdeý jumystaryn erterek aıaqtaý qajet», - deıdi Baýyrjan Qaljanov.
Sonymen qatar, basqarma basshysy aǵymdaǵy jyly «Qaýipsiz eńbek» aqparattyq naýqanyn ótkizý jóninde daıyndalǵan «Jol kartasy» aıasynda atqarylatyn is-sharalar úsh baǵytta júrgiziletinin atap ótti. Atalǵan sharalar óndiristik jaraqattar men zııandy eńbek jaǵdaıyn azaıtýǵa, eńbekti qorǵaý mádenıetin kóterý maqsatynda uıymdastyrylyp otyr.