Shymkentte bir táýlikte 60 adam koronavırýs juqtyrǵan

ShYMKENT. QazAqparat- Shymkentte koronavırýs ınfektsııasyn juqtyrǵan 60 adam tirkeldi. Bul týraly qalalyq tótenshe jaǵdaı shtaby málimet taratty, dep habarlaıdy QazAqparat tilshisi.

COVID-19 dıagnozy naqtylanǵandardyń 58-i - vırýs juqtyrǵandarmen jaqyn qarym-qatynasta bolǵandar. Taǵy bir adam Atyraý oblysynan kelgen. Sondaı-aq, jedel respıratorly vırýsty ınfektsııa belgilerimen aýrýhanaǵa jatqyzylǵan naýqastyń da qaýipti indet juqtyrǵany anyqtaldy. Olardyń barlyǵy ınfektsııalyq statsıonarǵa jatqyzylǵan.

«Qazirgi tańda naýqastardyń jaǵdaıy birqalypty. Bekitilgen hattamaǵa sáıkes tıisti em júrgizilýde. Profılaktıkalyq is-sharalardy júrgizý úshin, naýqaspen qarym-qatynasta bolǵan adamdar anyqtalýda.Aýrý oshaqtarynda dezınfektsııalyq jumystar júrgizilýde» delingen habarlamada.

Aıta keteıik, qala boıynsha koronavırýs ınfektsııasyn juqtyrǵandardyń sany 404 adamǵa jetken .