Shymkentte bir táýlikte 11 órt tirkeldi

ShYMKENT. QazAqparat - Shymkent qalasynyń órt sóndirýshileri bir táýliktiń ishinde 11 márte órt sóndirýge shyqqan. Shuǵyl shaqyrylymnyń biri qaladaǵy ashanalardyń birinen kelip tústi, dep habarlaıdy QazAqparat.

Qalalyq TJD málimetinshe, 3 qyrkúıek kúni saǵat 11.19-da shuǵyl kezekshilerge uıaly telefon arqyly habarlama kelip túsken. Onda Almaty tas jolyndaǵy «Plovtsentr» ashanasynda órt shyqqandyǵy týraly aıtylǵan. Oqıǵa ornyna jetken sóndirýshiler ashananyń plastıkalyq qaptamalary tolyǵymen janyp ketkenin anyqtady. 

«Ashananyń ishinen syıymdylyǵy 50 lıtr bolatyn eki gaz ballon qaýipsiz jerge shyǵaryldy. Órtti sóndirýge jeke quramnyń 21 adamy men 3 tehnıkasy jumyldyryldy. Jalyn saǵat 11.37-de tolyq aýyzdyqtaldy. Tilsiz jaýdan zardap shekkender men qaıtys bolǵandar joq. Qazir órttiń shyǵý sebepteri anyqtalýda» delingen habarlamada.