Shymkentte bir táýlikte 10 órt tirkelgen

ShYMKENT. QazAqparat – Shymkent qalasynyń órt sóndirýshileri bir táýlikte 10 ret shaqyrtýǵa shyqqan. Shaharda eki nysan otqa oranyp, qurǵaq shóp pen qoqys jáshikteri órtengen, dep habarlaıdy QazAqparat tilshisi.

Qalalyq tótenshe jaǵdaı departamenti baspasóz qyzmetiniń málimetinshe, shaqyrtýlardyń biri Nursát shaǵyn aýdanyndaǵy azyq-túlik dúkeninen túsken.

Oqıǵa ornyna órt sóndirý bólimsheleri jetkende bes qabatty turǵyn úıge japsarlasa soǵylǵan dúkenniń plastıkalyq tereze jaqtaýlary jáne ekinshi qabatynda ornalasqan «Doner» ortalyǵynyń tóbesindegi jappasy janyp jaqanyn anyqtaǵan. Tilsiz jaýdy aýyzdyqtaýǵa órt sóndirý bóliminiń jeke quramynda 28 adam men 5 tehnıka jumyldyrylyp, jalyn túngi saǵat 04.00 - de tolyǵymen sóndirilgen.

Taǵy bir órt Eńbekshi aýdanynda «Kortýs» dámhanasynyń aýlasynda tirkeldi. Munda kólemi 195 sharshy metr aǵash oryndyqtary men tapshandar jáne aǵash qorshaýlary janyp, jalyn qasynda ornalasqan 120 sharshy metrdi quraıtyn «Insta bar» kafesine ótip ketken.

Órt sóndirý qyzmetiniń jeke quramynda 36 adamy men 7 tehnıkasy jáne «Apattar medıtsınalyq ortalyǵy» fılıalynyń 1 brıgadasy oqıǵa ornyna jetip, 04:41 mınýtta órt tolyǵymen sóndirilgen.

Barlyq 10 órt oqıǵasy boıynsha zardap shekkender men qaıtys bolǵandar tirkelmegen.