Shymkentte bir rettik vakýým probırkanyń 57 túri shyǵarylady

ShYMKENT. QazAqparat – Shymkenttik «EkoFarm Interneıshnl» kompanııasy bir rettik sterıldi vakýým probırkanyń 57 túri shyǵaryp keledi. Elimizde jáne TMD-da balamasy joq biregeı zaýytta medıtsınalyq maqsattaǵy buıymdar óndiriledi, dep habarlaıdy QazAqparat tilshisi.

Segiz jyl buryn ashylǵan seriktestikte búginde 191 qyzmetker jumysqa tartylǵan. Zaýytta kóktamyr qanyn, qan plazmasyn, qan sarysýyn alý jáne saqtaý úshin vakýýmdyq probırkalarmen qatar eki jaqty ınelerdiń 6 túri jáne ıne ustaǵysh shyǵarylady. Zaýyttyń óndiristik qýaty jylyna 70 mln dana bir rettik sterıldi vakýýmdyq probırkany jáne 50 mln dana ıne men ıne ustaǵyshty quraıdy. Kompanııa sonymen qatar bir rettik medıtsınalyq kıimder men dári aptechkasy men fıto sháı shyǵaryp otyr. Qajet bolǵan jaǵdaıda óndiris kólemin eki esege ulǵaıtý múmkindigi bar.

Ońtústik Koreıa, Aýstrııa jáne Shveıtsarııadan zamanaýı qural-jabdyqtarmen jabdyqtalǵan zaýyt elimizdegi medıtsınalyq uıymdardyń suranysyn tolyq qamtamasyz etip otyr. Qazirgi tańda kompanııa tegin medıtsınalyq kómektiń kepildik berilgen kólemi sheńberinde jáne mindetti áleýmettik medıtsınalyq saqtandyrý júıesinde júzege asyratyn «SK-Farmatsııa» JShS-men uzaq merzimdi shartqa qol qoıyp, elimizdegi barlyq medıtsınalyq ujymdardy qamtamasyz etýde.

Búginde koronovırýs ınfektsııasyna qatysty jarııalanǵan pandemııaǵa jáne elimizde jarııalanǵan tótenshe jaǵdaıǵa baılanysty medıtsınalyq mekemelerdi bir rettik sterıldi vakýýmdyq probırkaǵa suranys shamamen 4 mln danaǵa ósken. Osyǵan baılanysty «EkoFarm Interneıshnl» otandyq aýrýhanalar men medıtsınalyq ortalyqtardyń suranysyn tolyqtaı qamtamasyz etip keledi.