Shymkentte bir kúnde myńnan astam adam qan tapsyrdy
ShYMKENT. QazAqparat - Shymkentte bir kúnde myńnan astam adam qan tapsyrdy. Oblystyq qan ortalyǵynda donor bolǵandar osylaısha muqtaj jandar úshin úlken kómek kórsetti, dep habarlaıdy QazAqparat HAA tilshisi.
Ortalyqqa kelip, donor bolǵysy kelgenderdiń basym kópshiligi eriktiler. Aralarynda belgili bir merzimde qan tapsyryp otyratyn azamattar da bar. Jalpy sala mamandarynyń sózine qaraǵanda, deni saý adam úshin 450 mılılıtr kóleminde qan berý - fızıologııalyq jaǵynan esh qaýipsiz, ári qalypty jaǵdaı. Zertteý nátıjeleri men mamandardyń tájirıbıesi qan tapsyrýdyń adam densaýlyǵyna óte paıdaly ekenin kórsetedi.Sondyqtan donor bolýdyń eshqandaı zııany joq dep otyr. Sonymen qatar donor bolýǵa yqylas bildirgenniń aǵzasy regeneratsııa úderisteriniń ótýine baılanysty jasarady. Júrek-qan tamyrlar aýrýlarynyń aldyn alýǵa kómektesip, ımmýndyq júıe jumysy da jaqsaratynyn aıtady.
«Kóp qan ketken jaǵdaıda, eshqashan qan tapsyrmaǵan adamnan - donordyń tiri qalýǵa múmkindigi kópteý. Sebebi onyń aǵzasy qan joǵaltyp úırengen. Sondyqtan árbir adam ómirinde bir ret donor bolýy tıis. Onyń ústine bizde qan tapsyrǵandar óz densaýlyǵy jaıynda málimetti aqysyz túrde alady. Mysaly VICh, gepatıt V, S, merez tańbalaǵyshtarynyń óz qanynyń quramynda bar-joǵyn anyqtaý orta eseppen bir aılyq eńbekaqy kóleminde bolady. Eger donor bolsańyz, onda ózińizge jáne jaqyn týystaryńyzǵa qajettilik týyndaǵan kezde qan komponentterin alýǵa kepildeme beriledi», - deıdi oblystyq qan ortalyǵy bas dárigeriniń orynbasary Jaınara Astanaeva.
