Shymkentte bir aptada baılanys ortalyǵyna 90 myńnan astam turǵyn habarlasqan

ShYMKENT. QazAqparat – Shymkentte «Azamattarǵa arnalǵan úkimettiń» 1414 biryńǵaı baılanys ortalyǵynyń baılanys nómirine bir aptanyń ishinde 90 myńnan astam adam habarlasqan. Turǵyndardyń qońyraýyn tájirıbeli jáne daıyndyqtan ótken 144 maman qabyldap, memlekettik qyzmetter boıynsha keńesterin bergen, dep habarlaıdy QazAqparat tilshisi.

Elimizdegi tótenshe jaǵdaıǵa baılanysty shym shahardaǵy Halyqqa qyzmet kórsetý ortalyqtary 25 naýryzdan beri jumysyn ýaqytsha toqtatqan bolatyn. Azamattarǵa arnalǵan úkimet 1414 biryńǵaı baılanys ortalyǵynyń jumysyn kúsheıtý úshin HQO qyzmetkerlerin tartty. Budan bólek, 49 qyzmetker qyzmet alýshylardy «Mobıldik azamattar bazasynda» tirkep, beıneqońyraýlardy qabyldaýǵa jumyldyryldy.

«Azamattarǵa arnalǵan úkimet» memlekettik korporatsııasy Shymkent fılıalynyń ókili Altynaı Tataevanyń aıtýynsha, memlekettik qyzmet máseleleri jónindegi biryńǵaı baılanys ortalyǵyna orta eseppen kúnine 18 myńǵa jýyq adam habarlasady. Ortalyqtyń mamandary biryńǵaı baılanys ortalyǵyna habarlasýshylardyń kóptigin eskerip, qala turǵyndaryn shydamdylyq tanytýǵa shaqyrady.

«Azamattardy negizinen tótenshe jaǵdaı kezinde tabysynan aıyrylýyna baılanysty taǵaıyndalatyn 42 500 teńge járdemaqysyn alý, egov.kz arqyly anyqtamaǵa qol jetkizý sııaqty suraqtar mazalaıdy. Sondaı-aq, AÁK tólemderin taǵaıyndaý boıynsha da kóptegen saýaldar túsip jatyr. Turǵyndardyń suraqtaryna tolyqqandy ári naqty jaýaptar berilýde», - deıdi Altynaı Tataeva.