Shymkentte bilim salasyndaǵy sybaılas jemqorlyqtyń aldyn alý máselesi talqylandy

ShYMKENT. QazAqparat – Shymkentke arnaıy jumys saparymen kelgen QR Sybaılas jemqorlyqqa qarsy is-qımyl agenttiginiń ókili Arman Berdalın jáne respýblıkalyq aqparattyq-aǵartýshylyq shtabynyń basshysy Yrza Tursynzada qaladaǵy 200-ge jýyq bilim mekemeleriniń basshylarymen kezdesti, dep habarlaıdy QazAqparat tilshisi.

Shymkent qalasynyń bilim basqarmasy jáne QR Sybaılas jemqorlyqqa qarsy is-qımyl agenttigi Shymkent qalasy boıynsha ókilderimen uıymdastyrylǵan jıynda Yrza Tursynzada agenttik janynan qurylǵan shtabtyń mańyzy, atqaratyn jumysy týraly tolyq aqparat berdi. Sondaı-aq, ol jas urpaq boıynda parasat qaǵıdalaryn júzege asyrýda jáne taratýda, qazaqstandyq patrıotızm rýhynda jeke tulǵany tárbıeleýde jáne sybaılas jemqorlyqty qabyldamaýdaǵy ustazdardyń mańyzdy rólin atap ótti.

«Jalpy memlekettiń órkendeýi - sybaılas jemqorlyqsyz damý baǵytynda barlyq tıisti sharalardy qabyldaýda. Bul maqsatqa jetý úshin eń aldymen óskeleń urpaqtyń tárbıesine kóńil aýdarý mańyzdy. Balany jastaıynan otansúıgishtikke, adaldyqqa, ádildikke, meıirimdilikke, qarapaıymdylyqqa úırete otyryp, jaman ádetterden aýlaq bolýǵa, bilim men eńbekke umtylýǵa tárbıe - úlkenderdiń negizgi maqsaty ekenin barshamyz bilemiz. Árbir ata - ana, árbir ustaz - balalar úshin laıyqty úlgi bolyp, naǵyz qasterli qasıetterdi tańdaýǵa kómektesetin uly tulǵalar», - dedi agenttik ókili Arman Berdalın.

Jıyn barysynda qatysýshylarǵa adam boıyndaǵy asyl qasıetter: adaldyq, parasat, ádildik jáne senim qundylyqtaryn qoǵam arasynda keńinen nasıhattaýdyń mańyzy aıtyldy.