Shymkentte beınebaqylaý kameralary arqyly 150-den astam qylmys ashyldy
ShYMKENT. QazAqparat - Shymkenttegi qoǵamdyq oryndar men halyqtyń kóp jınalatyn kóshelerinde 479 beınekamera qoıylǵan. Jyl basynan beri osy baqylaý quraldary arqyly 157 qylmys ashyldy, dep habarlaıdy QazAqparat HAA tilshisi.
Shymkent qalalyq ishki ister basqarmasynyń jedel basqarý ortalyǵy búginde qoǵamdyq oryndar men kópshilik júretin jerlerde oryn alǵan qylmysty baqylap otyrady. Kameralardyń kómegimen ashylǵan qylmystardyń qatarynda 68 urlyq, 14 avtokólik urlyǵy, 12 tonaý, 7 buzaqylyq, 4 buzaqylyq jáne qarýdy zańsyz saqtaý jaıttary bar.
Máselen, tamyz aıynda JBO beınekameralary «izin sýytpaı» avtokólik urlyǵyn ashýǵa sep boldy. Polıtsııaǵa 27 jastaǵy avtokólik ıesi qala kósheleriniń birinen onyń «Reno» avtokóligin urlap ketkeni týraly habarlaǵan. Atalǵan habarlama boıynsha beınebaqylaý tobynyń qyzmetkerleri avtokólikti baıqap, keshendi polıtsııa kúshterine habarlaǵan.
Tártip saqshylary izin sýytpaı kúdikti azamatty ustap, avtokólikti ıesine qaıtardy. Taǵy bir jaıt boıynsha beınebaqylaý tobynyń qyzmetkerleri meıramhanalardyń birinde qarýǵa uqsas zaty bar kúdiktini baıqap, polıtsııa ekıpajyn joldaǵan. Tekserý barysynda 24 jastaǵy jergilikti turǵynnan «Premer» tapanshasy tárkilenip alyndy. Oǵan qatysty Qylmystyq kodekstiń 287-babymen «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» boıynsha is qozǵalǵan. Sotqa deıingi tergeý amaldary júrgizilýde.
Beınebaqylaý kameralary arqyly 34 myń ákimshilik quqyqbuzýshylyq anyqtalǵan. Onyń 23 myńy jol júrý erejesin buzǵany boıynsha tirkelip otyr. Usaq buzaqylyq úshin 840 azamat ákimshilik jaýapqa tartylǵan bolsa, qoǵamdyq orynda tártipsizdigi úshin 687 jáne qoǵamdyq orynda alkogoldi ishimdik ishkeni úshin 984 adam jaýapqa tartylǵan.
