Shymkentte bes jylda 78 joba iske asyrylady - ákim

ShYMKENT. QazAqparat - Shymkenttiń jylý júıeleriniń tozý deńgeıi 42 paıyzdy quraıdy. Bul týraly qala ákimi Ǵabıdolla Ábdirahymov elimizdiń Premer -Mınıstri Asqar Mamınniń tóraǵalyǵymen ótken keńeste aıtty, dep habarlaıdy QazAqparat tilshisi.

Ǵabıdolla Ábdirahymovtyń sózinshe, Túrkistan oblysynan qabyldanǵan 99 nysandy kútip ustaý úshin densaýlyq saqtaý, áleýmettik qorǵaý jáne aýyl sharýashylyǵy basqarmalarynyń buryn shyǵyndaryn óteýge osy jyly 19 mlrd teńge suralyp otyr.

Sondaı-aq, ótken jyly respýblıkalyq bıýdjet esebinen qurylysy júrgizilgen nysandardy qarjylandyrý máselesi de ózekti bolyp tur. Sondyqtan qala ákimi Úkimet basshysynan birqatar problemalardy sheshýge yqpal etýin surady.

«2018 jyly Shymkent qalasyndaǵy «Turan» yqsham aýdanynyń ınjenerlik-ınfraqurylym júıeleri boıynsha 3 nysannyń qurylysyna respýblıkalyq bıýdjetten 2,7 mlrd teńge bólinip, tıisti jumystar atqarylǵan.Bıyl osy nysandardyń qurylysyn aıaqtaýǵa respýblıkalyq bıýdjetten 1 250 mln teńge bólýge yqpal etýińizdi suraımyz. Sonymen qatar, keshendi jospardaǵy jobalardy iske asyrý úshin 486,4 gektar jerdi memleket muqtajyna qaıtarý qajet. Oǵan jergilikti bıýdjetten 9,8 mlrd teńge jumsaý kerek»,- dedi Ǵabıdolla Ábdirahymov.

Shahar basshysynyń aıtýynsha, keshendi josparǵa sáıkes aldaǵy 5 jylda quny 1 trıllıon 119 mlrd teńgeni quraıtyn 78 joba iske asyrylatyn bolady. Onyń ishinde, respýblıkalyq bıýdjetten - 315,4 mlrd teńge, jergilikti bıýdjetten- 82,2 mlrd. teńge qarjy qajet. Al, memlekettik-jekemenshik áriptestik arqyly 75,3 mlrd teńge, jeke jáne basqa kózderden 645,7 mlrd teńge qarjy tartylmaq.

«Keshendi jospardy respýblıkalyq bıýdjettik komıssııaǵa 19 naýryzǵa deıin engizýdi jáne ortalyq memlekettik organ basshylaryna 26 naýryzǵa deıin kelisýdi aıaqtaýǵa yqpal etýińizdi suraımyn»,- dedi Ǵabıdolla Ábdirahymov.