Shymkentte bes qabatty úıde jarylys boldy

ShYMKENT. QazAqparat – Shymkenttegi Nursát móltekaýdanynda bes qabatty turǵyn úıde gaz-aýa qospasynyń jarylysy oryn aldy. Oqıǵanyń saldarynan páter jaldap turyp jatqan Reseı Federatsııasynyń 63 jastaǵy azamaty dene jaraqatyn alyp, oǵan alǵashqy medıtsınalyq kómek kórsetilgen, dep habarlaıdy QazAqparat tilshisi.

Qalalyq TJD baspasóz qyzmetiniń málimetinshe, jarylys tańǵy saǵat 06:27 shamasynda úıdiń birinshi qabatyndaǵy páterde bolǵan. Saldarynan terezeler men esikter synyp, úı zattary men jıhazdary janyp ketken. Turǵyn úıdegi 4 adam qaýipsiz jerge shyǵarylyp, taǵy 6 adam qutqarylǵan. Sondaı-aq, jarylys saldarynan kórshiles ornalasqan eki páterdiń terezeleri, «Aýdı» avtokóliginiń aldyńǵy áınegi zaqymdalǵan. Oqıǵa ornyna Shymkent qalasy TJD Órt sóndirý qyzmetiniń 29 jeke quramy men 6 tehnıkasy, Apattar medıtsına ortalyǵy fılıalynyń, jedel-qutqarý jasaǵynyń 8 qyzmetkeri men 2 tehnıkasy, Polıtsııa departamentiniń 20 qyzmetkeri men 7 tehnıkasy jumyldyrylǵan.

«Jalyn tańǵy saǵat 06.42-de oqshaýlanyp, saǵat 07.20-da tolyǵymen sóndirildi. Órttiń jalpy kólemi 35 sharshy metr quraǵan. Gaz sharýashylyǵy qyzmetiniń aldyn ala málimetinshe, jarylysqa gazdyń jınalýy sebep», - delingen habarlamada.