Shymkentte bes eldiń dárigerleri bedeýlik máselesin talqylady

ShYMKENT. QazAqparat - Shymkentte «Reprodýktıvti medıtsınanyń qazirgi zamanǵy máseleleri» atty IV halyqaralyq konferentsııa ótti. Bes eldiń dárigerleri bas qosqan jıynda bedeýlikti emdeýdiń jańa ádisteri talqylandy, dep habarlaıdy QazAqparat tilshisi.

Qazaqstan reprodýktıvti medıtsına qaýymdastyǵy men Shymkent qalalyq Densaýlyq saqtaý basqarmasynyń uıymdastyrýymen ótken sharaǵa Qazaqstan, Reseı, Ýkraına men Ózbekstannan kelgen 500-den asa dáriger qatysty. Konferentsııada mamandar jasandy jolmen tegin uryqtandyrý jáne bedeýlikti emdeýdiń tıimdi joldaryn talqylady. Sondaı-aq, bala súıgisi kelip júrgen otbasylarǵa kvotany kóbeıtý máselesin ortaǵa saldy.

«Elimizdegi otbasylardyń 15 paıyzynda bedeýlik máselesi kezdesedi. Ony emdeýdiń jańa ádisin engizý arqyly probemalardy sheshýge múmkindik bar. Qazaqstanda 16 myńnan astam bala jasandy uryqtandyrý jolymen dúnıege kelse, Shymkentte jylyna 500 bala týady. Konferentsııada emdeýdiń jańa ádisterimen qatar dárigerlerdiń jańa býynyn oqytý máselesi qozǵaldy», - dedi Qazaqstan reprodýktıvti medıtsına qaýymdastyǵynyń prezıdenti Vıacheslav Lokshın.

Jasandy jolmen uryqtandyrý boıynsha 25 jyldyq tájirıbesi bar Saltanat Baıqoshqarova bolsa elimizde reprodýktolog mamandardyń az ekenin atap ótti.

«Bedeýlikti zerttep, emdeıtin mamandar, ásirese, óńirilerde tapshy. Búginde gınekolog mamandardy qaıta oqytýǵa májbúrmiz. Sondyqtan mamandardy oqytý men kásibı jetildirýge nazar aýdarylý qajet», - dedi Saltanat Baıqoshqarova.