Shymkentte «Baýyrlas el» derekti fılminiń tusaýy kesildi
Fılmdi tamashalaýǵa Dúnıejúzi qazaqtary qaýymdastyǵy Tóraǵasynyń birinshi orynbasary Zaýytbek Turysbekov, Ózbekstan Respýblıkasynyń Qazaqstandaǵy Tótenshe jáne ókiletti elshisi Saıdıkram Nııazhodjaev jáne zııaly qaýym ókilderi men qoǵam qaıratkerleri, assambleıa músheleri jáne jastar qatysty, dep habarlaıdy QazAqparat tilshisi.
QR Prezıdenti teleradıo kesheniniń kómegimen jáne Dúnıejúzi qazaqtary qaýymdastyǵy men Qazaqstan ózbekteri etnomádenı birlestikteri «Dýstlık» qaýymdastyǵy birlese daıyndaǵan 20 mınýttyq derekti fılmde túbi bir týysqan qazaq-ózbek halyqtarynyń táýelsizdik jyldaryndaǵy jańa deńgeıi baıandalady. Bul týyndyda Qazaqstan Respýblıkasynyń Prezıdenti N. Nazarbaev pen Ózbekstan respýblıkasynyń Prezıdenti Sh. Mırzıeevtyń kezdesýlerinde qol jetkizilgen ýaǵdalastyqtar, baýyrlas elder arasyndaǵy ózara qarym-qatynastyń jańa kezeńi kórsetiledi. Fılmniń tanystyrylymynda sóz alǵan Ózbekstan Respýblıkasynyń Qazaqstandaǵy Tótenshe jáne ókiletti elshisi Saıdıkram Nııazhodjaev dostyqqa adal, birlikke bekem qazaq halqyna rızashylyqtaryn bildirip, barsha ózbekstandyqtardyń aqedil alǵysyn jetkizdi. Shymkent qalalyq Qazaqstan halqy Assambleıasy tóraǵasynyń orynbasary Muratáli Qalmuratov pen Túrkistan oblystyq «Qoǵamdyq kelisim» KMM basshysy mindetin atqarýshy Zańǵar Úsipahmetov jańa fılmniń mańyzyna toqtalyp, ózara mádenı-gýmanıtarlyq saladaǵy yqpaldastyqty odan ári nyǵaıtý jaıyn sóz etti.
Aıta ketý kerek, búginde Ózbekstanda 800 myńnan astam qandasymyz turady. Al Qazaqstandaǵy ózbek etnosy ókilderiniń sany 550 myńǵa jýyqtaıdy. Júzege asyp jatqan ıgi bastamalar eki el arasyndaǵy baılanysty odan ári nyǵaıta túsetindigine senim mol.
