Shymkentte baýyr almastyratyn densaýlyq nysany paıdalanýǵa berildi
ShYMKENT. QazAqparat - Búgin Shymkenttegi dıagnostıkalyq jáne reanımatsııalyq ota jasaý aýrýhanasy paıdalanýǵa berildi, dep habarlaıdy QazAqparat tilshisi.
Qazaqstan Respýblıkasynyń Tuńǵysh Prezıdenti kúni merekesine oraı, paıdalanýǵa berilgen densaýlyq saqtaý nysanynyń ashylý rásimine oblys ákimi Janseıit Túımebaev qatysyp, barsha medıtsına salasynyń qyzmetkerlerin quttyqtady.
Jańa nysan 2 jylda salynyp, iske qosylyp otyr. Densaýlyq saqtaý mekemesiniń birinshi qabatynda ákimshilik, qabyldaý jáne zerthanalyq-dıagnostıkalyq bólimderi ornalastyrylsa, ekinshi qabatynda palatalar men reanımatsııa bólimi bar. Al, úshinshi qabatta 7 bloktan turatyn ota jasaý bólimi men búırek pen baýyr almastyratyn gepatopankreatobılarlyq hırýrgııa bólimi ornalastyrylǵan. Emdelýshiler úshin de statsıonarda qosymsha 45 tósek-oryn qarastyrylǵan.
Aıta keteıik, Shymkent qalalyq jedel medıtsınalyq kómek kórsetý aýrýhanasy qala jáne oblys halqyna táýlik boıy hırýrgııa, jaraqat, ýrologııalyq, neırohırýrgııalyq, gınekologııalyq, nevrologııalyq jáne terapııalyq salalar boıynsha emdik sharalaryn júrgizedi. Mekeme mandandyrylǵan jáne joǵary mamandandyrylǵan jedel jáne josparly medıtsınalyq kómek kórsetetin kópsalaly statsıonar bolyp tabylady. Munda kúndelikti 200-250 naýqas medıtsınalyq kómekke júginedi. Orta eseppen olardyń 70-90 aýrýhanaǵa jatqyzylady. Emdeý mekemesi boıynsha jyl saıyn júıeli túrde emdik is-sharalardyń ınnovatsııalyq, joǵary tehnologııalyq ádisteri óndiriske endirilýde.
Jalpy, osy jyly oblys boıynsha 38 densaýlyq saqtaý nysandarynyń qurylysyna oblystyq bıýdjetten 3,8 mlrd teńge qaralyp, qurylystary júrgizilip otyr. Onyń 34 nysany jyl sońyna deıin tapsyrý josparlanǵan.
